თენგიზ შარმანაშვილი რადიკალებზე: მიხვდნენ, რომ აშშ-მა გადადგა ამერიკისთვის სწორი ნაბიჯები. მათთვის ტრამპიც საძულველია, ჩვენც საძულველი ვართ, ყველანაირი ადამიანი საძულველია, ვინც მათ ულტრალიბერალურ დღის წესრიგს არ მიჰყვება

ახლა მიხვდნენ, რომ აშშ-მა გადადგა ამერიკისთვის სწორი ნაბიჯები. მილიარდები, რომლებიც უცხო ქვეყნებში რევოლუციებისთვის იხარჯებოდა, ეს ორგანიზაციები გააუქმა, - განაცხადა ქართულ ოპოზიციასა და მის მედიასთან დაკავშირებით თავდაცვისა და უსაფრთხოების კომიტეტის თავმჯდომარის პირველმა მოადგილემ თენგიზ შარმანაშვილმა.

მისივე თქმით, მათ სურთ მეგობრობდნენ იმ ამერიკელებთან, რომლებიც არიან ულტრარადიკალები, ულტრამემარცხენეები და ულტრალიბერალები.

„ჩვეულებრივი პოლიტიკური სექტაა და აქაური სექტანტები არიან იმ დიდი სექტის ნაწილი. მათ უნდათ იმეგობრონ იმ ამერიკელებთან, რომლებიც არიან ულტრარადიკალები, ულტრამემარცხენეები და ულტრალიბერალები. იქ თუ ვინმე სხვა გაჭაჭანდა, ამერიკულ პოლიტიკაში, ის მათი მტერია. ასევე აკეთებენ ევროპელები. მარტა კოსმა ხომ განაცხადა, რომ მაგასთან ვისაც ექნება ურთიერთობა, ის ჩვენთან ვერ იმეგობრებს. მათთვის ტრამპიც საძულველია, ჩვენც საძულველი ვართ, ყველანაირი ადამიანი საძულველია, ვინც მათ, ამ ულტრალიბერალურ დღის წესრიგს არ მიჰყვება.

არხები, რომლებიც ფინანსდებიან და რომლებიც არიან „ნაციონალური მოძრაობიდან“ ან კრებსითი „ნაციონალური მოძრაობიდან“ და ისინი ხარჯავენ ამაში ფულს, აი, ამ პროპაგანდას ეწევიან. ახლა მიხვდნენ, რომ აშშ-მა გადადგა ამერიკისთვის სწორი ნაბიჯები. მილიარდები, რომლებიც უცხო ქვეყნებში რევოლუციებისთვის იხარჯებოდა, ეს ორგანიზაციები გააუქმა და ეს ფული მოაკლდა ამ ხალხს. უკვე აღარ ფინანსდებიან - USAID-ი არ არის, NED-ი არ არის და ასე შემდეგ. ასეთ ვითარებაში, როდესაც ისინი ფინანსურ სარგებელს ვეღარ ხედავენ ამერიკის დღევანდელი ადმინისტრაციისგან, მათ წარმოდგენაში, როგორც იდეოლოგიურად, ასევე პრაგმატულად, ფულს რომ აღარ აძლევენ, არიან მტრები“, - აღნიშნა შარმანაშვილმა.

ამერიკის ხელისუფლების სწორი პოლიტიკა ოპოზიციური მედიის მიერ წარმოებული ანტიამერიკული კამპანიის სამიზნე გახდა.

ტელეკომპანია „ფორმულის” ეთერში წამყვანმა ნინო ჟიჟილაშვილმა და სტუმარმა, „ჭავჭავაძის ცენტრის” მკვლევარმა გიგა ჯოხაძემ ამერიკის შეერთებული შტატების მოქმედი ადმინისტრაცია და პირადად პრეზიდენტი დონალდ ტრამპი ღია თავდასხმის, დაცინვისა და კრიტიკის ობიექტად აქციეს.