ირაკლი ზარქუა: არის ჯგუფი, მიმდევრები, რომელთაც ვერ დააჯერებ, რომ სააკაშვილი დამნაშავეა კონკრეტული მუხლებითა და საქმეებით

არის ჯგუფი, მიმდევრები, რომელთაც ვერ დააჯერებ, რომ სააკაშვილი დამნაშავეა, კონკრეტული მუხლებითა და საქმეებით. ეს ფაქტია და ამას ჩვენ არ ვამბობთ, არამედ ეს არის საერთაშორისო არბიტრაჟის გადაწყვეტილება, - ამის შესახებ საპარლამენტო უმრავლესობის წევრმა, ირაკლი ზარქუამ „ქრონიკაში“ ჩართვისას განაცხადა, რომელმაც ისაუბრა არის თუ არა სააკაშვილის საქმე პოლიტიზებული.

მისი თქმით, სააკაშვილის მხარდამჭერი მცირე ჯგუფის გარდა, მთელმა საქართველომ იცის, რომ ის დამნაშავეა და შესაბამისად, ციხეში ზის.

„ჩვენ საქმე გვაქვს დანაშაულთან. არ აქვს მნიშვნელობა, იქნება ეს სააკაშვილი, ღვინიაშვილი, ზარქუა თუ ნებისმიერი სხვა, ვინც დანაშაულს ჩაიდენს და იგი მას დაუმტკიცდება, მით უფრო საერთაშორისო არბიტრაჟით, მან საპატიმრო ვადა უნდა მოიხადოს. მე კარგად მესმის მათი ახლობლების, ოჯახის წევრებისა და მხარდამჭერების შეშფოთება, აღშფოთება, მაგრამ კანონი კანონია. ჩვენ ვცხოვრობთ სამართლებრივ სახელმწიფოში, სადაც კანონი უზენაესია და ასე უნდა იყოს“, - განაცხადა ზარქუამ.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. პატიმრობაში მყოფმა სააკაშვილმა შიმშილობა გამოაცხადა, მხარდამჭერები კი ყოფილი პრეზიდენტის გათავისუფლებას ითხოვენ. იუსტიციის სამინისტრომ სააკაშვილის ჯანმრთელობის მდგომარეობის პერიოდული დაკვირვებისა და საჭიროების შემთხვევაში, შესაბამისი რეკომენდაციების წარდგენის მიზნით შესაბამის უწყებებს მიმართა.

ამასთან, „ნაციონალური მოძრაობა“ მიხეილ სააკაშვილის მხარდამჭერ აქციას 14 ოქტომბერს გეგმავს.