POLITICO: ნატოს წევრი ქვეყნები სამშაბათს დაგეგმილ აშშ-ის შუალედურ არჩევნებში ყველაზე ცუდი სცენარის განვითარებისთვის ემზადებიან - ევროპელი მოკავშირეები შიშობენ, რომ „რესპუბლიკელების“ დამარცხებამ შესაძლოა პრეზიდენტ დონალდ ტრამპს ალიანსზე თავდასხმების მკვეთრი გაძლიერებისკენ უბიძგოს

ნატოს წევრი ქვეყნები სამშაბათს დაგეგმილ აშშ-ის შუალედურ არჩევნებში ყველაზე ცუდი სცენარის განვითარებისთვის ემზადებიან - ევროპელი მოკავშირეები შიშობენ, რომ „რესპუბლიკელების“ დამარცხებამ შესაძლოა პრეზიდენტ დონალდ ტრამპს ალიანსზე თავდასხმების მკვეთრი გაძლიერებისკენ უბიძგოს. ინფორმაციას ამის შესახებ გამოცემა POLITICO ნატოს ხუთ დიპლომატზე დაყრდნობით ავრცელებს.

მოკავშირეები შიშობენ, რომ თუ კონგრესი მას შიდა პოლიტიკაში შეზღუდავს, ტრამპმა - როგორც შეიარაღებული ძალების მთავარსარდალმა - შესაძლოა საკუთარი მემკვიდრეობის განმტკიცება საგარეო ასპარეზზე სცადოს, სადაც მოქმედების ბევრად მეტი თავისუფლება აქვს. სამი დიპლომატის თქმით, ეს შესაძლოა ევროპიდან კიდევ ათასობით ამერიკელი ჯარისკაცის გაყვანას ნიშნავდეს.

„უფლებამოსილების მიწურულს მყოფი პრეზიდენტებისგან, როგორც წესი, მოსალოდნელია ფრუსტრაციის გამოვლენა და საგარეო ასპარეზზე ავანტიურისტული ნაბიჯები“, - აღნიშნა ევროპის თავდაცვის სფეროს მაღალჩინოსანმა. „ხოლო ნატოზე იერიშის მიტანა, ეტყობა, ტრამპის მსოფლმხედველობის განუყოფელი ნაწილია“.

თეთრი სახლის პრესმდივნის თანაშემწემ, ოლივია უელსმა გამოცემა POLITICO-სთან საუბრისას აღნიშნა, რომ „პრეზიდენტმა ტრამპმა ნატოსთვის იმაზე მეტი გააკეთა, ვიდრე ნებისმიერმა სხვამ“. ამის დასადასტურებლად მან ხაზი გაუსვა მოკავშირეებთან მიღწეულ შეთანხმებას 2035 წლისთვის თავდაცვის ბიუჯეტების მშპ-ის 5%-მდე გაზრდის შესახებ, აშშ-ის სამხედრო წარმომადგენლობის გაფართოებას გრენლანდიაში და ვაშინგტონის ძალისხმევას უკრაინაში რუსეთის სრულმასშტაბური ომის დასასრულებლად.

ამასთან, ოლივია უელსის განცხადებით, ტრამპი „უცვლელად მიიჩნევს, რომ ირანთან კონფლიქტისას ნატოს მოკავშირეებს შეერთებული შტატების გვერდით უნდა ეომათ“. მან ასევე დასძინა: „პრეზიდენტი არასდროს შეეგუება დასავლეთის პოზიციების ეტაპობრივ დათმობას და კვლავ შეუპოვრად დაიცავს ჩვენს ინტერესებს როგორც შინ, ისე საგარეო ასპარეზზე“.

შეშფოთების მთავარი მიზეზი დეკემბერში მოსალოდნელი ევროპაში განთავსებული აშშ-ის სამხედრო კონტინგენტის გადახედვის პროცესია. სამი დიპლომატის თქმით, თუ ტრამპს შიდა პოლიტიკაში საკანონმდებლო ინიციატივები დაებლოკება, მან შესაძლოა საკუთარი ამომრჩევლის მობილიზებისთვის ჯარების გაყვანის მასშტაბების მნიშვნელოვნად გაზრდა სცადოს.

ნატოს ყოფილი წარმომადგენლის, ოანა ლუნგესკუს შეფასებით, პრეზიდენტმა შესაძლოა ევროპაში ამერიკული სამხედრო ყოფნის შენარჩუნება პირდაპირ დაუკავშიროს იმას, მიიღებს თუ არა ევროპა უკრაინის საკითხზე აშშ-ის მიერ შეთავაზებულ სამშვიდობო გეგმას.

დიპლომატების შეფასებით, ტრამპმა შესაძლოა ალიანსის საერთო დაფინანსებაში ამერიკული შენატანები შეამციროს, შეზღუდოს ნატოს PURL-ის პროგრამა უკრაინისთვის იარაღის შესყიდვის შესახებ და რუსეთთან კავშირები კიდევ უფრო გააღრმავოს.