ტრამპი წინააღმდეგი არაა, რომ საიდუმლო ინფორმაციის გამჟღავნებისთვის დაკავებული პირებისთვის დახვრეტა შემოიღონ

აშშ-ის პრეზიდენტმა დონალდ ტრამპმა არიზონაში გამართულ საარჩევნო მიტინგზე განაცხადა, რომ საიდუმლო ინფორმაციის გამჟღავნებისთვის პასუხისმგებელი პირები უნდა დახვრიტონ. ინფორმაციას The Hill-ი ავრცელებს.

როგორც გამოცემა იუწყება, ტრამპის განცხადება, სავარაუდოდ, ირანის ბირთვულ ობიექტებზე აშშ-ის საჰაერო დარტყმებთან დაკავშირებულ ინფორმაციის გაჟონვას ეხებოდა.

„ვიღაცამ ინფორმაცია გაამჟღავნა - ვიღაც საზიზღარმა ტიპმა. ისინი ციხეში უნდა ჩასვან და დახვრიტონ. სიცოცხლის ბოლომდე ციხეში უნდა იყვნენ. გაამჟღავნეს, რომ მისურიდან 12:07 საათზე გავემგზავრებოდით. ამის შესახებ The New York Times-მა და CNN-მა დაწერეს. გაამჟღავნეს როგორც გამგზავრების, ისე ჩასვლის დრო. ამის გამო გამგზავრების ორი დღით გადადება მოგვიწია“, - განაცხადა ტრამპმა არიზონის შტატის ქალაქ ბულჰედ-სიტიში გამართულ მიტინგზე.

ტრამპი, სავარაუდოდ, 2025 წლის ივნისში ჩატარებულ ოპერაციას „შუაღამის უროს“ გულისხმობდა, რომლის ფარგლებშიც აშშ-მა ირანის ბირთვულ ობიექტებზე დარტყმები განახორციელა.

„ჩემი აზრით, ინფორმაციის გამჟღავნებისთვის პასუხისმგებელი პირები უნდა დახვრიტონ. ძველ დროში ასეთ ადამიანებს ვხვრეტდით“, - განაცხადა ტრამპმა.

მან საკუთარ საქმიანობასთან დაკავშირებული საკითხების გაშუქებისას ჟურნალისტებიც ინფორმაციის გამჟღავნებაში დადანაშაულებულ პირებს შეადარა და აღნიშნა, რომ ისინი „თითქმის ისეთივე ცუდები არიან, როგორც ინფორმაციის გამჟღავნებისთვის პასუხისმგებელი პირები“.

„ისინი ცრუ ინფორმაციას ავრცელებენ. ეს მათ ინფორმაციის გამჟღავნებაში დამნაშავეებად აქცევს“, - თქვა პრეზიდენტმა და დასძინა, რომ ჟურნალისტები ხშირად წყაროების დასახელების გარეშეც ავრცელებენ ინფორმაციას.