Reuters: სი ძინპინი, პირველად შვიდი წლის შემდეგ, ინდოეთში ჩავიდა

ჩინეთის პრეზიდენტი სი ძინპინი ინდოეთის დედაქალაქ ნიუ-დელიში ჩავიდა, სადაც ორგანიზაცია BRICS-ის წევრი ქვეყნების ლიდერთა სამიტს დაესწრება და ინდოეთის პრემიერ-მინისტრ ნარენდრა მოდის შეხვდება. ინფორმაციას Reuters-ი ავრცელებს.

სი ძინპინის ვიზიტი ინდოეთში ბოლო შვიდი წლის განმავლობაში პირველი შემთხვევაა და იმ ფონზე მიმდინარეობს, როდესაც აზიის ორი მეზობელი ქვეყანა ურთიერთობების ფრთხილად აღდგენას ცდილობს. ორ ქვეყანას შორის ურთიერთობები 2020 წელს ჰიმალაის სადავო საზღვარზე მომხდარი სამხედრო შეტაკების შემდეგ მნიშვნელოვნად გაუარესდა. მაშინ 20 ინდოელი და ოთხი ჩინელი სამხედრო დაიღუპა.

სი ძინპინს აეროპორტში წითელი ხალიჩით დახვდნენ.

სი ძინპინისა და ნარენდრა მოდის შეხვედრა დღეს საღამოს არის დაგეგმილი. ჩინეთის საგარეო საქმეთა სამინისტროს წარმომადგენლის განცხადებით, ეს მათი მესამე შეხვედრა იქნება ბოლო სამი წლის განმავლობაში.

„ჩინეთი მზად არის ინდოეთთან ერთად იმუშაოს, ორმხრივ ურთიერთობებს სტრატეგიული და გრძელვადიანი პერსპექტივიდან შეხედოს, სათანადოდ მართოს არსებული უთანხმოებები და იყოს კარგი მეზობელი და მეგობარი, ასევე ურთიერთდახმარების პარტნიორი“, - განაცხადა ჩინეთის საგარეო საქმეთა სამინისტროს წარმომადგენელმა.

BRICS-ში შედიან ბრაზილია, რუსეთი, ინდოეთი, ჩინეთი, სამხრეთი აფრიკა, ეგვიპტე, ეთიოპია, ინდონეზია, ირანი და არაბთა გაერთიანებული საამიროები.

Reuters-ის ცნობით, სამიტი იმართება იმ ფონზე, როდესაც აშშ-ისა და ისრაელის ომი ირანთან, ასევე რუსეთ-უკრაინის ომი გეოპოლიტიკურ დაძაბულობას იწვევს. ამ კონფლიქტებმა მნიშვნელოვანი გავლენა მოახდინა გლობალურ ენერგეტიკაზე, ვაჭრობასა და სატრანსპორტო კავშირებზე.