ბრიტანული დაზვერვა: უკრაინის ომში რუსეთმა ნახევარი მილიონი სამხედრო დაკარგა

ბრიტანეთის დაზვერვის შეფასებით, უკრაინაში რუსეთის სრულმასშტაბიანი ომის დაწყებიდან დაახლოებით ნახევარი მილიონი რუსი სამხედრო დაიღუპა, ხოლო დაჭრილების ჩათვლით რუსეთის არმიის საერთო დანაკარგი 1,5 მილიონს აღწევს. ინფორმაციას Sky News-ი ავრცელებს.

ამასთან, დასავლელი ოფიციალური პირების განცხადებით, ომში რუსეთისთვის მიყენებულ მძიმე დანაკარგებს, როგორც ადამიანური მსხვერპლის, ისე რუსეთის ეკონომიკაზე მზარდი ზეწოლის თვალსაზრისით, არ შეუცვლია ვლადიმირ პუტინის მიზანი, უკრაინა მოსკოვის გავლენის სფეროში მოაქციოს.

ბრიტანეთის შეიარაღებული ძალების ხელმძღვანელმა, საჰაერო ძალების მარშალმა სერ რიჩ ნაითონმა განაცხადა, რომ 2022 წლის თებერვლიდან რუსეთის სამხედრო დანაკარგების საერთო რაოდენობამ, მათ შორის დაჭრილებმა, სავარაუდოდ, 1,5 მილიონს მიაღწია.

მისი თქმით, დანაკარგების უდიდესი ნაწილი 2023 წლის იანვრიდან დაფიქსირდა, მაშინ როდესაც რუსეთის ჯარებმა უკრაინის ტერიტორიის მხოლოდ დაახლოებით 2%-ის დაკავება შეძლეს.

„ვფიქრობ, ეს ციფრები ნათლად აჩვენებს, თუ რამდენად უაზრო და უშედეგო მსხვერპლს წარმოადგენს ადამიანების სიცოცხლის დაკარგვა ასეთი მცირე წინსვლისთვის და პრეზიდენტ პუტინის ამგვარი არალეგიტიმური მიზნის მისაღწევად“, - განუცხადა ჟურნალისტებს ბრიტანეთის თავდაცვის შტაბის უფროსმა.

ნახევარი მილიონი დაღუპული რუსი სამხედრო მოსამსახურის შესახებ საუბრისას ნაითონმა აღნიშნა: „ეს ნიშნავს, რომ რუსეთის დანგრეულ და ჩაბნელებულ სახლებში კედლებზე ნახევარი მილიონი ადამიანის ფოტო კიდია. ეს ნიშნავს, რომ ნახევარი მილიონი ოჯახი ვეღარასოდეს იხილავს საკუთარ მამას, შვილს, ძმას ან მეუღლეს“.

მოსკოვის მიერ უკრაინის წინააღმდეგ სრულმასშტაბიანი ომის დაწყებიდან 1 660 დღე გავიდა. შესაბამისად, რუსული ძალები უკრაინაში უკვე უფრო დიდხანს იბრძვიან, ვიდრე რუსეთი პირველ და მეორე მსოფლიო ომებში მონაწილეობდა.

ნაითონმა ასევე ისაუბრა ომის გავლენაზე რუსეთის ეკონომიკაზე.

მისი თქმით, ომმა „რუსეთში ეკონომიკური ზრდის შენელება, სამომხმარებლო მოთხოვნის შემცირება და ინფლაციის ჯიუტად მაღალი მაჩვენებელი გამოიწვია“, ხოლო „რუსეთის ეკონომიკისა და მისი მოსახლეობის კეთილდღეობისა და სამომავლო პერსპექტივებისთვის გაწეული ფასი უზარმაზარია“.