Reuters: აშშ-ის წარმომადგენელთა პალატა ლინდსი გრემის მიერ რუსეთის წინააღმდეგ მომზადებულ კანონპროექტს მომავალი კვირიდან განიხილავს

აშშ-ის წარმომადგენელთა პალატა მომავალ კვირაში რუსეთზე ფართომასშტაბიანი სანქციების დაწესების შესახებ კანონპროექტის განხილვას დაიწყებს. ინფორმაციას Reuters-ი ავრცელებს.

სააგენტოს ცნობით, კანონპროექტს, რომლის ინიციატორიც გარდაცვლილი რესპუბლიკელი სენატორი ლინდსი გრემი იყო, სენატმა უკვე დაუჭირა მხარი, თუმცა წარმომადგენელთა პალატაში მას „დემოკრატების“ მხრიდან სერიოზული წინააღმდეგობა ელოდება.

წარმომადგენელთა პალატის წესების კომიტეტმა განაცხადა, რომ კანონპროექტის განსახილველად სხდომა ორშაბათს, დღის მეორე ნახევარშია დაგეგმილი. „რესპუბლიკელების“ მიერ კონტროლირებად კომიტეტში კანონპროექტის დამტკიცება წარმომადგენელთა პალატაში მისი კენჭისყრაზე გატანის საშუალებას მისცემს, რაც შესაძლოა კვირის ბოლოს მოხდეს.

სამხრეთ კაროლინის შტატის რესპუბლიკელი სენატორი ლინდსი გრემი, რომელიც ივლისში გარდაიცვალა, კონგრესში უკრაინის ერთ-ერთი ყველაზე აქტიური მხარდამჭერი იყო. მის მიერ ინიციირებული კანონპროექტი ითვალისწინებს რუსეთის ოფიციალური პირებისთვის სანქციების დაწესებას და აშშ-ის პრეზიდენტისთვის ჩინეთის, ინდოეთისა და სხვა ქვეყნების წინააღმდეგ მაღალი ტარიფების დაწესების უფლებამოსილების მინიჭებას, რათა ამ ქვეყნებმა რუსულ ნავთობსა და გაზზე დამოკიდებულება შეამცირონ.

კანონპროექტის მიღება უკრაინისა და რუსეთისთვის მნიშვნელოვანი გზავნილი იქნება, რომ აშშ კვლავ მხარს უჭერს კიევის ხელისუფლებას რუსეთის სრულმასშტაბიანი შეჭრის წინააღმდეგ ბრძოლაში. კანონპროექტის მიზანია, მოსკოვზე ეკონომიკური ზეწოლა გაიზარდოს იმ შემოსავლების წყაროების შეზღუდვით, რომლებსაც რუსეთი ომის დასაფინანსებლად იყენებს, წერს სააგენტო.

სენატმა გასულ თვეში კანონპროექტს, სახელწოდებით „ლინდსი ო. გრემის 2026 წლის კანონი რუსეთისა და ირანის სანქციების შესახებ“, 86 ხმით 11-ის წინააღმდეგ დაუჭირა მხარი. კენჭისყრის პროცედურას უკრაინის პრეზიდენტი ვოლოდიმირ ზელენსკი აკვირდებოდა. მანამდე ზელენსკი კანონმდებლებს შეხვდა და კანონპროექტის მხარდაჭერისკენ მოუწოდა.

წარმომადგენელთა პალატაში კანონპროექტის დამტკიცების შემთხვევაში, ის თეთრ სახლში გადაიგზავნება. აშშ-ის პრეზიდენტს, „რესპუბლიკელ“ დონალდ ტრამპს, უკვე აქვს ნათქვამი, რომ კანონპროექტს მხარს უჭერს.

თუმცა, როგორც Reuters-ი წერს, ის ორპარტიული მხარდაჭერა, რომელმაც კანონპროექტს სენატში წარმატებით გავლის შესაძლებლობა მისცა, შესაძლოა წარმომადგენელთა პალატაში საკმარისი არ აღმოჩნდეს.