ევროკომისიამ უკრაინის საჰაერო და სარაკეტო თავდაცვისთვის 6,1 მილიარდი ევრო დაამტკიცა

ევროკომისიამ უკრაინისთვის დამატებით 6,1 მილიარდი ევროს გამოყოფა დაამტკიცა. თანხა უკრაინის მიერ საჰაერო და სარაკეტო თავდაცვის სისტემების, საბრძოლო მასალის, დრონებისა და ელექტრონული ბრძოლის საშუალებების შესაძენად იქნება გამოყენებული.

ევროკომისიის განცხადებით, დაფინანსება უკრაინის შესაძლებლობებს გააძლიერებს და დაეხმარება ქვეყანას, გაუმკლავდეს რუსეთის მიერ ბალისტიკური რაკეტებითა და დრონებით თავდასხმების გაძლიერებას.

„დღეს ჩვენ დავამტკიცეთ 6,1 მილიარდი ევროს გამოყოფა, რათა უკრაინამ შეიძინოს სხვადასხვა თავდაცვითი შეიარაღება საჰაერო და სარაკეტო თავდაცვის, საბრძოლო მასალის, დრონებისა და ელექტრონული ბრძოლის სფეროებში. ამ გადაწყვეტილების შემდეგ უკრაინას უკვე შეუძლია შეიძინოს მისთვის საჭირო Patriot-ის სისტემების აღჭურვილობა, რათა უკეთ დაიცვას საკუთარი საჰაერო სივრცე რუსეთის თავდასხმებისგან. წევრ სახელმწიფოებთან და ნატოსთან ერთად ჩვენ გავაგრძელებთ უკრაინის მხარდაჭერას და ამავდროულად გავაძლიერებთ ევროპის თავდაცვის შესაძლებლობებს“, - განაცხადა ევროკომისიის პრეზიდენტმა ურსულა ფონ დერ ლაიენმა.

ევროკომისიის ცნობით, გამოყოფილი თანხებით შეიარაღების შეძენა შესაძლებელი იქნება როგორც ევროკავშირის, ისე უკრაინული კომპანიებისგან.

დაფინანსება გამოიყოფა უკრაინის მხარდაჭერისთვის განკუთვნილი 90 მილიარდი ევროს სესხის ფარგლებში. პაკეტი ითვალისწინებს სტანდარტული დასაშვებობის პირობებიდან ხუთ გამონაკლისს: სამი გამონაკლისი ეხება უკრაინული წარმოების დრონებსა და კომპონენტებს, რომლებიც დადგენილ ღირებულების ზღვარს აღემატება, ხოლო ორი - აშშ-ში წარმოებულ აღჭურვილობას, მათ შორის Patriot-ის ტიპის რაკეტებს, მათ შორის ნატოს მიერ კოორდინირებული PURL-ის მექანიზმის გამოყენებით, აღნიშნულია ევროკომისიის მიერ გავრცელებულ ინფორმაციაში.

ევროკომისიის ცნობით, უკრაინის მხარდაჭერის სესხიდან 30 მილიარდი ევრო საბიუჯეტო დახმარებისთვის, ხოლო 60 მილიარდი ევრო თავდაცვისთვის არის გათვალისწინებული 2026-2027 წლების პერიოდში.