კანადა უკრაინას მასშტაბურ თავდაცვით და ენერგეტიკულ პაკეტს გამოუყოფს

კანადა უკრაინას მასშტაბურ თავდაცვით და ენერგეტიკულ პაკეტს გამოუყოფს. კანადის პრემიერ-მინისტრმა, მარკ კარნიმ და უკრაინის პრეზიდენტმა, ვოლოდიმირ ზელენსკიმ ამის შესახებ ალბერტას პროვინციის ქალაქ კალგარიში გამართულ ერთობლივ პრესკონფერენციაზე განაცხადეს.

როგორც მარკ კარნიმ აღნიშნა, რუსეთი უკრაინის წინააღმდეგ ბარბაროსულ საჰაერო ომს აძლიერებს და სამოქალაქო მოსახლეობას უმიზნებს, რის გამოც ქვეყნის საჰაერო თავდაცვა კრიტიკულად მნიშვნელოვანი ხდება.

„სწორედ ამიტომ, დღეს დილით კანადამ და უკრაინამ შეთანხმება დადეს, რომელიც შეერთებული შტატების JUMPSTART-ის მექანიზმის გავლით, საჰაერო თავდაცვისთვის კრიტიკულად მნიშვნელოვანი საჰაერო რაკეტების მიწოდებას ითვალისწინებს“, - განაცხადა კანადის პრემიერმა.

აღნიშნული მიზნებისთვის კანადა 350 მილიონ დოლარს გამოყოფს იმ აღჭურვილობის პაკეტისთვის, რომელიც უკრაინელი ხალხის, ინფრასტრუქტურისა და ცის დაცვას უნდა ემსახუროს. თავის მხრივ, ვოლოდიმირ ზელენსკიმ კანადას ახალი თავდაცვითი პაკეტისთვის მადლობა გადაუხადა.

„ეს არის პირველ რიგში ჩვენი საჰაერო თავდაცვის გაძლიერება. მადლობას გიხდით ამ პაკეტისთვის, ეს ძალიან მნიშვნელოვანია“, - აღნიშნა უკრაინის პრეზიდენტმა.

მისივე თქმით, ამჟამად კანადაში უკრაინელი პილოტების მომზადებაც მიმდინარეობს და სწავლებას 21 უკრაინელი გადის.

გარდა თავდაცვითი მხარდაჭერისა, კანადა უკრაინას ზამთრის გადატანაშიც დაეხმარება. როგორც მარკ კარნიმ განაცხადა, ამ მიზნით კანადა გაზის შესყიდვისთვის 430 მილიონ დოლარზე მეტს საკრედიტო გარანტიების სახით გამოყოფს.