ალჟირმა არაბთა გაერთიანებულ საამიროებთან დიპლომატიური ურთიერთობები გაწყვიტა

ალჟირმა განაცხადა, რომ გადაწყვიტა, არაბთა გაერთიანებულ საამიროებთან დიპლომატიური ურთიერთობები გაწყვიტოს. ინფორმაციას Reuters-ი ავრცელებს.

ალჟირის განცხადებით, აბუ-დაბიმ არაერთი „პროვოკაციული და მტრული“ ქმედება განახორციელა, მიუხედავად „არაერთგზის გაფრთხილებისა“.

ალჟირის საგარეო საქმეთა სამინისტროს განცხადებით, საამიროების ქმედებებმა ისეთ ზღვარს მიაღწია, რომ მათი მიღება ან მოთმენა უკვე შეუძლებელი გახდა და ალჟირმა „ორმხრივი ურთიერთობების შენარჩუნების ყველა შესაძლებლობა ამოწურა“.

უწყების ცნობით, არაბთა გაერთიანებული საამიროების ელჩი სამინისტროში დაიბარეს, გადაწყვეტილების შესახებ აცნობეს და მის შესასრულებლად 48-საათიანი ვადა მისცეს.

როგორც სააგენტო წერს, ორ ქვეყანას შორის ურთიერთობები ბოლო წლებში სულ უფრო იძაბებოდა. ალჟირის მედიასაშუალებები მკაცრად აკრიტიკებდნენ საამიროებს და მას რეგიონში უთანხმოების გაღვივების მცდელობაში ადანაშაულებდნენ.

ალჟირსა და არაბთა გაერთიანებულ საამიროებს რამდენიმე რეგიონულ საკითხზე განსხვავებული პოზიციები აქვთ.

ალჟირი ისრაელთან ურთიერთობების ნორმალიზებას ეწინააღმდეგება, მაშინ როდესაც არაბთა გაერთიანებულმა საამიროებმა და ალჟირის რეგიონულმა მეტოქემ, მაროკომ, 2020 წელს აშშ-ის შუამავლობით გაფორმებული „აბრაამის შეთანხმებების“ ფარგლებში ისრაელთან დიპლომატიური ურთიერთობები დაამყარეს.

ორი ქვეყანა დასავლეთ საჰარის ათწლეულების განმავლობაში მიმდინარე დავაშიც ერთმანეთის საპირისპირო მხარესაა.

არაბთა გაერთიანებული საამიროები მხარს უჭერს მაროკოს პრეტენზიას დასავლეთ საჰარაზე სუვერენიტეტის შესახებ და ამ ტერიტორიაზე საკონსულოც აქვს გახსნილი. ალჟირი კი მხარს უჭერს „პოლისარიოს ფრონტს“, რომელიც დამოუკიდებელი დასავლეთ საჰარის შექმნას მოითხოვს, იუწყება სააგენტო.