გიორგი ცაგარეიშვილი: ბინის ნაცვლად 10 ათას ლარიანი კომპენსაცია არ იმოქმედებს 45-ლარიან კომპენსაციაზე, რომელსაც დევნილები სულადობის მიხედვით იღებენ. არც სოციალურად დაუცველთა ერთიან სიაზე იმოქმედებს ეს გასაცემელი

ის 45-ლარიანი კომპენსაცია, რომელსაც იღებენ დევნილები სულადობის მიხედვით, შენარჩუნდება. არც სოციალურად დაუცველთა ერთიან სიაზე იმოქმედებს ეს გასაცემელი, - განაცხადა ჯანდაცვის მინისტრის მოადგილემ გიორგი ცაგარეიშვილმა გადაცემაში „დღის ქრონიკა“.

წამყვანმა ჰკითხა, ხომ არ მოეხსნებათ კომპენსაციის გაცემის შემდეგ დახმარება იმ ადამიანებს, რომლებიც დევნილის სტატუსით ყოველთვიურად თანხას იღებენ.

„ეს საერთოდ არ შეეხება სოციალურ გასაცემებს. ის 45-ლარიანი კომპენსაცია, რომელსაც იღებენ დევნილები სულადობის მიხედვით, შენარჩუნდება. არც სოციალურად დაუცველთა ერთიან სიაზე იმოქმედებს ეს გასაცემელი, რასაც ვვარაუდობთ, რომ დავიწყებთ ორშაბათიდან. ყველა პროგრამაში, რომელშიც ეს ადამიანები მონაწილეობენ, ისევ მიიღებენ მონაწილეობას და ჩვენ აქ არაფერს შევეხებით. ვფიქრობ, საკმაოდ დიდი იქნება მონაწილეობის სურვილი. უფრო მეტსაც გეტყვით, ვვარაუდობ, რომ 2000-ზე მეტი ოჯახი პირველივე დღეებში დააფიქსირებს განაცხადს და მივყვებით ჩვენ შემდეგ რიგითობის მიხედვით. მონიტორინგი სწრაფად განხორციელდება. არაუგვიანეს 45-ე დღისა, დაიწყება თანხების ჩარიცხვა, თუმცა შესაძლოა მანამდეც ჩაირიცხოს. „ლიბერთი ბანკის“ ანგარიშებზე ჩაირიცხება. არავითარი ზედმეტი დანახარჯი ბანკში ამ ადამიანებს არ დასჭირდებათ. ისედაც ერიცხებათ თავიანთ ბარათებზე“, - აღნიშნა ცაგარეიშვილმა.

მისი თქმით, პროცესის პირველი ეტაპი 19 ოქტომბრის 08:00 საათიდან დაიწყება 2 ნოემბრამდე გაგრძელდება.

„როგორც კი ავანაზღაურებთ მთლიანად ამ 58 მილიონს, შევყოვნდებით და მომავალი წლის დასაწყისიდან განვაახლებთ“, - აღნიშნა ცაგარეიშვილმა.

მთავრობის გადაწყვეტილებით, თითოეულ დევნილ ოჯახს, რომელსაც წარსულში არ აქვს მიღებული საცხოვრისი ან შესაბამისი კომპენსაცია, ექნება უფლება, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს შესაბამის სააგენტოში შეიტანოს განაცხადი, საცხოვრისის ნაცვლად, ფულადი კომპენსაციის მიღების შესახებ. კომპენსაციის ოდენობა იქნება 10,000 ლარი დევნილი ოჯახის თითოეულ წევრზე.