იძულებითი ფსიქიატრიული მკურნალობის ჩატარების, მისი გაგრძელების საფუძვლების შეფასებისა და პაციენტის სტაციონარიდან გაწერის წესი იცვლება - პარლამენტმა „ფსიქიკური ჯანმრთელობის შესახებ“ კანონში ცვლილება პირველი მოსმენით მიიღო

საქართველოს პარლამენტმა „ფსიქიკური ჯანმრთელობის შესახებ“ კანონში ცვლილება, თანმდევ პროექტებთან ერთად, პირველი მოსმენით, დაჩქარებული წესით განიხილა და 78 ხმით მხარი დაუჭირა.

საკითხი პლენარულ სხდომაზე განსახილველად იურიდიულ საკითხთა კომიტეტის თავმჯდომარის პირველმა მოადგილემ ირაკლი შატაკიშვილმა წარმოადგინა.

კანონის პროექტის თანახმად, იცვლება იძულებითი ფსიქიატრიული მკურნალობის ჩატარების, მისი გაგრძელების საფუძვლების შეფასებისა და პაციენტის სტაციონარიდან გაწერის წესი.

კერძოდ, იძულებითი ფსიქიატრიული მკურნალობის დანიშვნიდან, თვეში ერთხელ ფსიქიატრიული დაწესებულების სპეციალური კომისია იხილავს და არკვევს, ისევ არის თუ არა აშკარა ის საფუძვლები, რომელთა მიხედვითაც დაინიშნა მკურნალობა; კომისიის გადაწყვეტილება, როგორც იძულებითი ფსიქიატრიული მკურნალობის, ასევე არანებაყოფლობითი ფსიქიატრიული მკურნალობის შემთხვევაში, გასაჩივრდება ადმინისტრაციული წესით.

იძულებითი ფსიქიატრიული მკურნალობის შეფარდებიდან 6 თვეში ერთხელ, ადმინისტრაცია კომისიის მიერ მიღებულ გადაწყვეტილებას, დოკუმენტაციასთან ერთად, სასამართლოს უგზავნის და სასამართლო იხილავს, ისევ არის თუ არა აშკარა ის საფუძვლები, რომლებზე დაყრდნობითაც პაციენტს შეეფარდა მკურნალობა.

ცვლილების თანახმად, მკურნალ ექიმს კვლავ აქვს უფლებამოსილება ნებისმიერ დროს მიმართოს კომისიას, თუ მიიჩნევს, რომ პაციენტი ვადამდე გამოჯანმრთელდა.