სენატორი რენდ პოლი კორონავირუსისგან გამოჯანმრთელდა და ადგილობრივ საავადმყოფოში მოხალისედ დაიწყო მუშაობა

ამერიკელი სენატორი, „რესპუბლიკური პარტიის“ წევრი რენდ პოლი კორონავირუსისგან გამოჯანმრთელდა. როგორც თავად სენატორმა აღნიშნა, მან ადგილობრივ საავადმყოფოში მოხალისედ მუშაობა დაიწყო.

„მადლობას გიხდით ყველა იმ კეთილი სურვილებისთვის, რომელიც მივიღე. კვლავ გავიარე ტესტირება და შედეგი უარყოფითი აღმოჩნდა. ადგილობრივ საავადმყოფოში მოხალისედ დავიწყე მუშაობა, რათა მათ დავეხმარო, ვისაც სამედიცინო დამხარება სჭირდებათ, მათ შორის, კორონავირუსით ინფიცირებულ პაციენტებს. ერთად გადავლახავთ ამას!“ - დაწერა სენატორმა Twitter-ზე.

რენდ პოლი აშშ-ის სენატის პირველი წევრი იყო, რომელსაც კორონავირუსით ინფიცირება დაუდგინდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

რა უნდა ვიცოდეთ საგანგებო მდგომარეობის შესახებ, წაიკითხეთ აქ.