​ივა ჭყონია: მოქალაქეებს მოვუწოდებ, დამშვიდდნენ, ქვეყანაში სურსათის სამი თვის მარაგია

საგანგებო მდგომარეობა არ ნიშნავს იმას, რომ მოსახლეობას სურსათის შესყიდვა ეზღუდება. სწორი მინიშნება მისცა მთავრობამ. აბსოლუტურად ყველა სავაჭრო ობიექტი განსაკუთრებულ რეჟიმში მუშაობს. მოქალაქეებს მოვუწოდებ, რომ დამშვიდდნენ, ქვეყანაში სამი თვის მარაგები არსებობს, - ამის შესახებ Imedinews-ს დისტრიბუტორთა ასოციაციის ხელმძღვანელმა ივა ჭყონიამ განუცხადა.

მისი თქმით, ლარსის გზა გახსნილია და სურსათით მომარაგების პრობლემა არ არსებობს.

ჭყონია აცხადებს, რომ პანიკური შესყიდვები ლარის კურსზეც აისახება და ეროვნული ვალუტის გაუფასურებას გამოიწვევს. „მინიმუმ 3 თვის მარაგები ქვეყანაში არსებობს. მოსახლეობას მოვუწოდებ ნუ აჰყვება პანიკას. ეს დოლარზე მოთხოვნას გაზრდის და ლარი უფრო მეტად გაუფასურდება“, - აღნიშნა ჭყონიამ.

საქართველოში 21 აპრილამდე საგანგებო მდგომარეობა ამოქმედდა. რა უნდა ვიცოდეთ საგანგებო მდგომარეობის შესახებ, წაიკითხეთ ამ ბმულზე.

საქართველოში კორონავირუსი 48 ადამიანს დაუდასტურდა. მათგან ერთი ინფექციური კლინიკიდან უკვე გაეწერა. ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.