ვახტანგ ცინცაძე: საქართველოს ეკონომიკა განაგრძობს სწრაფი ტემპებით განვითარებას, რეკორდული მაჩვენებლები ფიქსირდება როგორც ექსპორტის, ისე ადგილობრივი ექსპორტის მიმართულებით

„საქართველოს ეკონომიკა განაგრძობს სწრაფი ტემპებით განვითარებას, აგვისტოს თვეში ეკონომიკურმა ზრდამ 6.3% შეადგინა, ხოლო იანვარი-აგვისტოს საშუალო ეკონომიკური ზრდის მაჩვენებელი 7.6%-ს გაუტოლდა“, - განაცხადა ეკონომიკისა და მდგრადი განვითარების მინისტრის მოადგილემ ვახტანგ ცინცაძემ.

მინისტრის მოადგილემ ეკონომიკური ზრდის ბოლო მონაცემების შეფასებისას ხაზი გაუსვა, რომ ზრდა საკმაოდ დივერსიფიცირებულია და მასში არაერთ სექტორს შეაქვს მაღალი კონტრიბუცია, მათ შორის - დამამუშავებელი მრეწველობის, ინფორმაციის და კომუნიკაციების, საფინანსო და სადაზღვევო საქმიანობების, ვაჭრობის, ჯანდაცვის, ტრანსპორტისა და დასაწყობების და სხვა სექტორებს.

„აქვე უნდა აღინიშნოს, ეკონომიკური ზრდის ხელშემწყობია საგარეო ვაჭრობის კუთხით დაფიქსირებული ტენდენციები - რეკორდული მაჩვენებლები ფიქსირდება როგორც ექსპორტის, ისე ადგილობრივი ექსპორტის მიმართულებით. ხაზს გავუსვამდი ადგილობრივი ექსპორტის ზრდის მაჩვენებელს, რომელიც 63%-ს აჭარბებს და რეკორდულ 3.3 მლრდ აშშ დოლარს აღწევს“, - აღნიშნა ვახტანგ ცინცაძემ.

მინისტრის მოადგილე ყურადღებას ამახვილებს იმ ფაქტზე, რომ არსებული შედეგების ფონზე, არაერთმა საერთაშორისო საფინანსო ინსტიტუტმა ზრდის მიმართულებით დაადასტურა საქართველოს 2026 წლის ეკონომიკური ზრდის პროგნოზი. ამასთან, ვახტანგ ცინცაძე ხაზს უსვამს, რომ აღნიშნული დაზუსტება ხდება იმ ფონზე, როცა რეგიონის არაერთი ქვეყნის ეკონომიკური ზრდის პროგნოზი შემცირების მიმართულებით კორექტირდება.

„აღსანიშნავია, რომ საქართველოს მთავრობა განაგრძობს ერთი მხრივ, ინფრასტრუქტურული პროექტების განხორციელებას, მეორე მხრივ კი, სტრუქტურული რეფორმების გატარებას, რომლებიც, მათ შორის, კერძო სექტორის კონკურენტუნარიანობის ამაღლებაზეა მიმართული და საბოლოო ჯამში, პროდუქტიულობის ზრდას უწყობს ხელს, რაც განაპირობებს საქართველოს ეკონომიკაში დაფიქსირებულ შედეგებს“, - განაცხადა ეკონომიკის მინისტრის მოადგილემ.