ირაკლი ხელაძე: 40 ათას ლარიანი ზღვარი აიწია 100 ათას ლარამდე. 81 ათასი მოქალაქე იყო ასეთი, რომლებიც იხდიდნენ ქონების გადასახადს, ისინი გათავისუფლდებიან აღნიშნული გადასახადისგან

გაიზარდა სამუშაო ადგილების რაოდენობა, გაიზარდა დასაქმებულთა რიცხვი, გაიზარდა ოჯახის ნომინალური შემოსავლები და შესაბამისად, ის 40 ათას ლარიანი ზღვარი, რომელიც 20 წლის წინ იყო დაწესებული, უკვე ვეღარ პასუხობდა დღევანდელ ეკონომიკურ რეალობას, - განაცხადა საფინანსო-საბიუჯეტო კომიტეტის თავმჯდომარის პირველმა მოადგილე ირაკლი ხელაძემ კანონპროექტზე, რომელიც ფიზიკური პირებისთვის ქონების გადასახადს ეხება.

მისი თქმით, 40 ათას ლარიანი ზღვარი აიწია 100 ათას ლარამდე

„40 ათას ლარიანი ზღვარი აიწია 100 ათას ლარამდე. 81 ათასი მოქალაქე იყო ასეთი, რომლებიც იხდიდნენ ქონების გადასახადს, ისინი გათავისუფლდებიან აღნიშნული გადასახადისგან. საერთო ჯამში, თანხაზე რომ გადავიანგარიშოთ, დაახლოებით 43 მილიონი ლარი დარჩება ისევ და ისევ ოჯახებში და ეკონომიკაში წავა ბრუნვაში“, - განაცხადა ირაკლი ხელაძემ.

ბიუროს სხდომაზე ქონების გადასახადის შესახებ კანონპროექტის ინიციირება იგეგმება. ახალი ცვლილებით, ფიზიკურ პირებს ქონების გადასახადი დაეკისრებათ იმ შემთხვევაში, თუ მათი შემოსავალი ასი ათასი ლარიდან დაიწყება. მიღებული გადაწყვეტილებით გადასახადი დაახლოებით 81 ათას ადამიანს უუქმდება.