რომში კედლის უდიდესი ანტიკური მოზაიკა წარადგინეს

რომში საზოგადოებას ყველაზე დიდი კედლის მოზაიკა და ფრესკა წარუდგინეს, რომელზეც იდუმალი ქალაქია გამოსახული. ისინი თითქმის 2000 წლისაა.

ახ.წ. I საუკუნით დათარიღებული მ ასშტაბური ხელოვნების ნიმუშები 1990-იან წლებში, ტრაიანეს თერმების გათხრებისას, ერთ-ერთ მიწისქვეშა გალერეაში აღმოაჩინეს და მათ რესტავრაციას მრავალი წელი დასჭირდა.

10 მეტრის სიმაღლისა და 16 მეტრის სიგრძის „დიადი მოზაიკა“ ოპიუსის ბორცვის ძირში მდებარეობს, სადაც 64-დან 68 წლამდე იმპერატორმა ნერონმა თავისი ცნობილი „ოქროს სახლი“ ააგო. თუმცა ჯერ კიდევ გაურკვეველია, მოზაიკა ნერონის ფუფუნებით აღსავსე სასახლის ნაწილი იყო თუ მის მშენებლობამდე არსებულ კერძო სახლს ეკუთვნოდა, რომელიც მოგვიანებით სასახლის კომპლექსს შეუერთეს. კოლოსეუმის სიახლოვეს მდებარე მთელი ეს ტერიტორია 109 წელს იმპერატორმა ტრაიანემ საზოგადოებრივ აბანოებად გადააკეთა, ასე რომ, მოზაიკა და იქვე მდებარე ფრესკა დამსვენებლებისთვის ერთგვარ ფონს წარმოადგენდა.

„ჩვენი შეფასებით, ეს არის ყველაზე დიდი კედლის მოზაიკა, რაც კი რომაულ სამყაროში ოდესმე აღმოუჩენიათ. გათხრებს კვლავ ვაგრძელებთ, რათა დავადგინოთ, სად მთავრდება ის“, - აცხადებს არქეოლოგი ფრანჩესკო პაჩეტი.

სამწუხაროდ, მოზაიკის ნაწილის აღდგენა ვერ მოხერხდა, თუმცა შემორჩენილი ფრაგმენტებიც მნახველზე დიდ შთაბეჭდილებას ახდენს. მასზე ჩიტის ფრენის სიმაღლიდან ჩანს გალავნით შემოსაზღვრული საპორტო ქალაქი თავისი მოედნებითა და კოშკებით. ქუჩებში გარკვეული მოვლენები ვითარდება. ზედა ნაწილში გამოსახულნი არიან პერსონაჟები, რომლებიც თითქოს თვალს ადევნებენ ქვემოთ, პორტში მიმდინარე მოვლენებს. მათ შორის არის წვერიანი ფილოსოფოსი და მისი მუზა, რამდენიმე ქანდაკება, კენტავრი და ახალგაზრდა პოეტი.

ექსპერტებმა ჯერ კიდევ არ იციან, ეს სცენები გამოგონილ, იდეალურ ქალაქს ასახავს თუ რეალურ ადგილს.

მოზაიკიან ოთახში შესასვლელ ორ სვეტს შორის განთავსებულია 10 კვ.მ ფართობის ფრესკა „მოხატული ქალაქი“. მასზეც დეტალურად არის გამოსახული ქალაქი საპორტო ჭიშკრით, გზებით, თეატრითა და ტაძრით.

ამჟამად არქეოლოგები მოზაიკის კიდევ ერთ მონაკვეთზე მუშაობენ, სადაც რთველი და ღვინის დაწურვის პროცესია ასახული. დამთვალიერებელთა კომფორტისთვის აღდგენილ ნანგრევებს შორის დამონტაჟდა სათვალთვალო ბილიკები და მოეწყო განათება.

გათხრებისას არქეოლოგებმა ასევე მიაგნეს მარმარილოთი მოპირკეთებული კედლის კვალსა და მარმარილოსვე დეკორირებულ ნიშას, რომლის სიმაღლე 2,2 მეტრია. სავარაუდოდ, ნაგებობის თავდაპირველი სიმაღლე დაახლოებით 12 მეტრს აღწევდა.

ტრაიანეს თერმების ნანგრევები 60 ათას კვადრატულ მეტრს მოიცავს. ერთ-ერთ კედელში ამოჭრილი თაროები მიანიშნებს, რომ თერმები შესაძლოა ანტიკურ ბიბლიოთეკადაც გამოიყენებოდა. ამაზე მიუთითებს საფეხურების მწკრივებიც, რომლებიც, სავარაუდოდ, საჯარო კითხვისა და შეკრებებისთვის იყო განკუთვნილი.

რომის ხელისუფლება გეგმავს, ეს ტერიტორია წიგნის პრეზენტაციებისთვის გამოიყენოს, რაც მის პირველად დანიშნულებას სრულად შეესაბამება.