პოლონეთში რობოტებმა ხელოვნურ ინტელექტზე კონტროლის დაწესება მოითხოვეს

ვარშავაში, პოლონეთის ციფრულ საქმეთა სამინისტროს შენობასთან აქცია გაიმართა, რომელშიც 30-მდე რობოტმა მიიღო მონაწილეობა. ისინი ხელოვნური ინტელექტის დანერგვის რეგულირებასა და სამუშაო ადგილების დაცვას ითხოვდნენ.

ქუჩაში ჰუმანოიდური მანქანები და ოთხფეხა, ძაღლისმაგვარი რობოტები გავიდნენ. ისინი წრეზე მოძრაობდნენ და დროშებს აქნევდნენ.ისმოდა ლოზუნგები: „დავიცვათ სამუშაო ადგილები“, „წესების დაწესების დროა“ და „ნუ ელოდებით, დააწესეთ რეგულაციები“.

მიტინგის ორგანიზატორი ინიციატივა Democratism-ია, რომელიც შრომის ბაზარზე ხელოვნური ინტელექტისა და რობოტიზაციის გავლენას იკვლევს. აქციის ერთ-ერთმა მონაწილემ, რობოტმა Agibot A3-მა განაცხადა, რომ პოლონეთის დედაქალაქში შეკრებილ მანქანებს უნდა დაემტკიცებინათ, თუ რამდენად ხელმისაწვდომი გახდა უკვე მსგავსი ტექნოლოგიები.

აქციის ორგანიზატორმა გჟეგოჟ კულისმა განმარტა, რომ დასაქმებულების რობოტებითა და AI-ით ჩანაცვლების რისკზე ყურადღების მიპყრობა სურდა. მისი თქმით, ცვლილებებმა შესაძლოა არამხოლოდ ფიზიკური, არამედ ინტელექტუალური შრომაც მოიცვას.

კულისმა მოუწოდა ისეთი წესების შემუშავებისკენ, რომლებიც დასაქმებულებს ახალი ტექნოლოგიების დანერგვის შედეგებისგან დაიცავს. უშუალოდ აქციაში რობოტების გამოყენება მან მათი ამჟამინდელი შესაძლებლობების თვალსაჩინოდ დემონსტრირების სურვილით ახსნა: მანქანებს უკვე შეუძლიათ დამოუკიდებლად გადაადგილება და რთული მოქმედებების შესრულება.

აქციამ გამვლელების ყურადღება მიიპყრო. მონაწილეებთან ასევე გამოვიდა პოლონეთის ციფრულ საქმეთა მინისტრი კშიშტოფ გავკოვსკი, რომელიც კულისს ესაუბრა.