თავდაცვის მინისტრმა ტერიტორიული თავდაცვის ბრიგადების პირად შემადგენლობას ქვედანაყოფების დაარსების დღე მიულოცა

საქართველოს ვიცე-პრემიერი, თავდაცვის მინისტრი ირაკლი ჩიქოვანი ტერიტორიული თავდაცვის ბრიგადების დაარსების დღისადმი მიძღვნილ ღონისძიებას დაესწრო.

საიუბილეო ღონისძიებაზე, რომელიც ბათუმში, მე-10 ტერიტორიული თავდაცვის ბრიგადის სამხედრო ბაზაზე აღინიშნა, რეზერვისტებმა საზეიმოდ დადეს სამხედრო ფიცი.

თავდაცვის მინისტრმა ეროვნული გვარდიის ტერიტორიული თავდაცვის მე-10 და მე-20 ბრიგადის პირად შემადგენლობას ქვედანაყოფების დაარსების დღე, ხოლო რეზერვისტებს - ფიცის დადება მიულოცა.

ირაკლი ჩიქოვანმა სიტყვით გამოსვლისას აღნიშნა, რომ ეროვნული გვარდიის ტერიტორიული თავდაცვის ბრიგადები სარეზერვო სისტემის ერთ-ერთი მნიშვნელოვანი კომპონენტია საქართველოს უსაფრთხოების დაცვის საქმეში.

ბრიგადების პირად შემადგენლობას სიტყვით მიმართეს საქართველოს თავდაცვის ძალების მეთაურმა, გენერალ-ლეიტენანტმა გიორგი მათიაშვილმა და ეროვნული გვარდიის უფროსმა, ბრიგადის გენერალმა რომან ჯოხაძემ.

ღონისძიებაზე წუთიერი დუმილით პატივი მიაგეს საქართველოს ტერიტორიული მთლიანობისთვის ბრძოლებში, სამშვიდობო მისიებსა და სამსახურეობრივი მოვალეობის შესრულების დროს დაღუპულთა ხსოვნას.

გაიმართა წარმატებული გვარდიელების დაჯილდოების ცერემონიაც. სამხედროები დაჯილდოვდნენ თავდაცვის სამინისტროს უწყებრივი მედლებით - „სამშობლოსთვის თავდადებული“ და „გიორგი ანწუხელიძე“. მათ, ასევე სამკერდე ნიშნები - „ღირსეული გვარდიელი“, სერტიფიკატები და ფასიანი საჩუქრები გადაეცათ.

ღონისძიების დასრულების შემდეგ, თავდაცვის მინისტრი, თავდაცვის ძალების მეთაურთან ერთად, მე-10 ტერიტორიული თავდაცვის ბრიგადის ბაზის ინფრასტრუქტურას გაეცნო. მან, ბაღდათის მიტროპოლიტ მეუფე ანტონთან და საპატრიარქოს წარმომადგენლებთან ერთად, დაათვალიერა ბაზის ტერიტორიაზე ახალგახსნილი წმინდა დიდთა მოწამეთა არგვეთის მხედარმთავართა, დავით და კონსტანტინე მხეიძეების სახელობის ტაძარი.

ინფორმაციას თავდაცვის სამინისტრო ავრცელებს.