კახა აბულაძე ბაღების მენიუდან რძის პროდუქტების დროებით ამოღებაზე: დავეყრდენით სპეციალისტების რეკომენდაციებს, რომლის მიხედვითაც, დაავადების მიმდინარეობისას მნიშვნელოვანია, რომ არ მიიღონ რძის პროდუქტი

თბილისის მერის მოადგილის კახა აბულაძის განმარტებით, დედაქალაქის საბავშვო ბაგა-ბაღების მენიუდან რძის პროდუქტების დროებით ამოღება დაკავშირებულია დაავადებათა კონტროლის ეროვნული ცენტრის რეკომენდაციებთან, რომლის თანახმად, მნიშვნელოვანია, რომ დაავადების მიმდინარეობისას არ მიიღონ რძის პროდუქტი და სხვა ცხიმიანი საკვები.

ამის თაობაზე აბულაძემ საზოგადოებრივი მაუწყებლის პირდაპირ ეთერში განაცხადა, სადაც უპასუხა ჟურნალისტის კითხვას იმასთან დაკავშირებით, თუ რატომ შევიდა ცვლილებები საბავშვო ბაღების მენიუში.

„ცვლილებები მხოლოდ კვების მხრივ არ ყოფილა. საგანგებო რეჟიმი გულისხმობს, მათ შორის, სანიტარიული და ჰიგიენური მიმართულების სხვა რეჟიმს, რომელიც ადაპტირებულია ბაღებში ვირუსული პერიოდისას. რაც შეეხება, კონკრეტულად, რძის პროდუქტს, იქ მხოლოდ რძის პროდუქტზე არ არის ლაპარაკი, დაავადებათა კონტროლის ეროვნულმა ცენტრმა გაავრცელა ეს თავის განცხადებაშიც და ჩვენ ამ რეკომენდაციებს დავეყრდენით - დაავადების მიმდინარეობისას მნიშვნელოვანია, რომ დაავადებულმა არ მიიღოს რძის პროდუქტი, ცხიმის შემცველი პროდუქტი, ასევე შემწვარი და სხვა ტიპის პროდუქტები. ეს დაავადებას კიდევ უფრო ამწვავებს. ეს რეკომენდაცია 3-4 დღით მოგვცეს. ეს პერიოდი უკვე გადის და ორშაბათიდან ჩვეული მენიუ დაუბრუნდება საბავშვო ბაღებს, თავისი კალორაჟით“, - განაცხადა კახა აბულაძემ.