თბილისი „მობილობის ევროპულ კვირეულს“ მეშვიდედ უერთდება

„მობილობის ევროპულ კვირეულს“ დედაქალაქი უკვე მეშვიდე წელია უერთდება. კვირეულის ფარგლებში, თბილისის მერიის ტრანსპორტისა და ურბანული განვითარების სააგენტომ სხვადასხვა აქტივობა ჩაატარა.

მოქალაქეებს მეტროს მუშაობისა და მეტროსადგურ „სახელმწიფო უნივერსიტეტის“ შიდა ინფრასტრუქტურის გაცნობის შესაძლებლობა ჰქონდათ. დამთვალიერებლებს სამუშაო პროცესის შესახებ ინფორმაცია შპს „თბილისის სატრანსპორტო კომპანიის“ ტექნიკურმა პერსონალმა მიაწოდა.

ასევე, მოქალაქეები დიდი დიღმის მეორე ავტობაზას ესტუმრნენ. ვიზიტის ფარგლებში, ტექნიკურმა თანამშრომლებმა მათ ავტობუსების სისტემის მუშაობის სპეციფიკა გააცნეს.

„მობილობის ევროპული კვირეული“ ყოველწლიურად 16-22 სექტემბერს აღინიშნება და მდგრადი ურბანული მობილობის შესახებ ცნობიერების ამაღლებას ემსახურება. წელს კვირეულს 41 ქვეყანა აღნიშნავს. წლევანდელი თემაა „მობილობა ყველასათვის“.