„ჯუჯების აქციები იყო ქოცების მართული ძარცვის დაკანონება“ - „ნაციონალური მოძრაობის“ აქტივისტი აქონდროპლაზიის მქონე ბავშვების დისკრიმინაციას განაგრძობს

„ნაციონალური მოძრაობის“ აქტივისტი აქონდროპლაზიის მქონე ბავშვების დისკრიმინაციას განაგრძობს. შეურაცხმყოფელი პოსტები დარინა მიქელაძემ „ფეისბუკში“ გამოაქვეყნა - მას შემდეგ, რაც მის პირველ პოსტს მშობლების მწვავე რეაქცია მოჰყვა, მან დაცინვის კამპანია განაგრძო.

„ესაა ძარცვა, დაკანონებული ძარცვა მშიერი ბავშვების მკურნალობის სახელით, რომელსაც არანაირი შედეგი არ მოაქვს. ჯუჯების აქციები იყო ქოცების მართული ძარცვის დაკანონება და არანაირი შედეგი არ მოუტანია დღემდე. აი, ესაა სიმართლე“, - წერს აქტივისტი დარინა მიქელაძე სოციალურ ქსელში.

პოსტს გამოეხმაურა ორგანიზაცია „პატარა ადამიანები საქართველოდან“ დამფუძნებელი ლია შალვაშვილი. მისი თქმით, მიქელაძის ბრალდებები სიმართლეს არ შეესაბამება და მიზნად ისახავს საზოგადოებაში შეცდომაში შეყვანას.

„ვგმობთ ასეთ საქციელს და იმ ცრუ ბრალდებებს, რომელიც მან გაავრცელა, თითქოს ეს მედიკამენტი არის უშედეგო. მოგახსენებთ, უკვე სამი წელი გახდება, რაც 35 ბავშვი არის ჩართული ამ პროგრამაში. დაფინანსებულია სახელმწიფოს მიერ, ბავშვებმა სიმაღლეში მოიმატეს 14-18 სანტიმეტრი. ამ შედეგებს აკნინებს ეს ქალბატონი და საზოგადოება შეცდომაში შეჰყავს. ამ მედიკამენტმა არამხოლოდ სიმაღლეში ზრდაზე იმოქმედა, არამედ იმ გართულებულ სიტუაციებზე, რომელიც ამას ახასიათებს. მივიღებთ სათანადო ზომებს, რომ კანონის ფარგლებში დაისაჯოს“, - განაცხადა ორგანიზაციის „პატარა ადამიანები საქართველოდან“ დამფუძნებელმა ლია შალვაშვილმა