თამარ მახარაშვილი ახალ სახელმძღვანელოებზე: ფორმა, მეთოდოლოგია აბსოლუტურად შეცვლილია და ეს არის კონსტრუქტივისტული მიდგომით წარმოდგენილი სახელმძღვანელოები. ეს ნიშნავს, რომ მოსწავლე პასიური მსმენელი კი არ არის, არამედ თავად არის ამ ცოდნის შენების მონაწილე

საქართველოს განათლების, მეცნიერებისა და ახალგაზრდობის მინისტრის მოადგილე თამარ მახარაშვილმა გადაცემაში „დღის ქრონიკა“ ახალი სასკოლო სახელმძღვანელოების ძირითად საკითხებზე ილაპარაკა. მან აღნიშნა, რომ ახალი მეთოდოლოგიით შედგენილი სახელმძღვანელოებით მოსწავლე არ არის პასიურ როლში და ის თავად მონაწილეობს ცოდნის შექმნაში.

„დამტკიცდა ახალი ეროვნული სასწავლო გეგმა, ახალი სტანდარტი, რასაც მოჰყვა სახელმძღვანელოების თემა და 2026 წელს პირველ, მეშვიდე და მეათე კლასებში უკვე ახალი სახელმძღვანელოები შევიდა. ეს ერთ-ერთი უმნიშვნელოვანესი და დიდი სიახლე გახლავთ. ამ სახელმძღვანელოებში თავად ფორმა, მეთოდოლოგია აბსოლუტურად შეცვლილია და ეს არის კონსტრუქტივისტული მიდგომით წარმოდგენილი სახელმძღვანელოები. ეს ნიშნავს, რომ მოსწავლე პასიური მსმენელი კი არ არის, არამედ 21-ე საუკუნის მოსწავლე სვამს ასეთ შეკითხვებს - რას ვისწავლი, რაში გამოვიყენებ და თავად არის ამ ცოდნის შენების მონაწილე.

კიდევ სიახლე არის ის, რომ QR კოდებიდან დაწყებული, ყველა ინფორმაცია, ყველა მასალა, თუ რამე შეიძლება ჩვენს არქივებში იყოს და თქვენ იცით, რამდენი განძი გვაქვს დავანებული ჩვენს არქივებსა და მუზეუმებში, ყველა კარი გაიხსნა ჩვენთვის და სახელმძღვანელოებში შესაძლებელია, რომ ამ QR კოდებზე თემატურად იყოს დატანილი ყველა დამატებითი ინფორმაცია. აბსოლუტური სიახლეა ბოტები შესაბამისი საგნის სახელმძღვანელოებში, სადაც მოსწავლეს შეუძლია, AI-ის დახმარებით, ბოტს დაუსვას შესაბამისი შეკითხვები და მიიღოს შესაბამისი პასუხები.

ჩვენი სახელმძღვანელოების ძირითადი მიმართულებაა და ზოგადი განათლების ეროვნული მიზნები ითვალისწინებს მთავარს - სკოლის მიმართ არის დაკვეთა, რომ შესაბამისი ხარისხიანი განათლება მიაწოდოს [ბავშვს], ისეთი, რომ სკოლიდან კონკურენტუნარიანი მოსწავლე გამოვიდეს. მაგრამ ყველაზე მთავარი დაკვეთა მაინც გახლავთ ერთი - სკოლამ საკუთარი ქვეყნის ისტორიის, ტრადიციის, კულტურის მცოდნე მოქალაქე უნდა გამოუშვას", - განაცხადა მინისტრის მოადგილემ.

მან ასევე ისაუბრა იმ კითხვების შესახებ, რომლებიც ახალ სახელმძღვანელოებთან დაკავშირებით გაჩნდა.

„ახალი სახელმძღვანელოები როგორც კი შევიდა [სკოლებში], კონკრეტულ საგნებზე იყო კითხვის ნიშნები. რასაკვირველია, ამას ველოდით, - განახადა თამარ მახარაშვილმა.

სახელმძღვანელოების შინაარსსა და ავტორებთან დაკავშირებით პოლიტიკური შენიშვნებისა და კრიტიკის შესახებ კი მინისტრის მოადგილემ განაცხადა:

„როგორ შეიძლება, რაიმე პოლიტიკური შინაარსი ჰქონდეს პროცესს, სადაც ჩვენი მთავარი მზიანია მაღალი კომპეტენციის ავტორი. ვინ იყო ავტორთა ჯგუფის შემადგენლობაში - ეს არის მაღალი კომპეტენციის ავტორი, რომელსაც აქვს სასკოლო სახელმძღვანელოების წერის გამოცდილება, არის შესაბამისი მაღალპროფესიონალი, დარგის ექსპერტი. მთავარი ნიშა რაც იყო, რითაც მოხდა ავტორთან ჯგუფის იდენტიფიცირება და შერჩევა, იყო ეს", - განაცხადა თამარ მახარაშვილმა.

მან ასევე აღნიშნა, ავტორთა ჯგუფში ასევე შედიოდნენ პრაქტიკოსი მასწავლებელი და ფსიქოლოგი.

„ავტორთა ჯგუფში გვყავდა პრაქტიკოსი მასწავლებელიც. ეს ძალიან მნიშვნელოვანია, რადგან ერთია, რას წერ ფურცელზე თეორიულად და მეორეა, როგორ იმუშავებს ეს საკლასო ოთახში. ასევე გვყავდა ფსიქოლოგი. გრიფირებული სახელმძღვანელოების ერთ-ერთი ძირითადი გამოწვევა, რომელიც კვლევებმა აჩვენა, იყო ის, რომ უნდა იყოს შესაბამისი მასალა, ასაკის შესაბამისი ენით და დოზით გადმოცემული. კიდევ ერთი მთავარი თემა, რომელიც ასევე კვლევებით გამოჩნდა, იყო ის, რომ შეიძლებოდა, სამი სახელმძღვანელო ყოფილიყო ერთ კლასში ერთ საგანში. და ბავშვი მობილობით ერთი სკოლიდან მეორე სკოლაში თუ გადავიდოდა, შეიძლებოდა, აბსოლუტურად სხვა მასალა დახვედროდა. ესეც იყო ერთ-ერთი გამოწვევა", - განაცხადა მინისტრის მოადგილემ.

თამარ მახარაშვილმა ასევე ისაუბრა ახალ სახელმძღვანელოებთან დაკავშირებით უკუკავშირის პლატფორმაზე.

„შევქმენით შესაბამისი პლატფორმა - საკლასო ოთახში რომ დატესტავს და ნახავს, როგორ იმუშავა ამ სახელმძღვანელომ, 1 ოქტომბრიდან ყველას შეეძლება, მოგვცეს უკუკავშირები. ეს პლატფორმა მხოლოდ მასწავლებლებისთვის არ იქნება გახსნილი. ყველას შეეძლება, რომ გვეკონტაქტოს კონკრეტულ თემაზე და მოგვაწოდოს დაწვრილებითი ინფორმაცია, რა შეიძლება იყოს უკეთესად, რა არის უკვე გამომდგარი და შეგვეხიდოს ამ ამბავში", - განაცხადა თამარ მახარაშვილმა.

მისი განმარტებით, თუ უკუკავშირების შედეგად ჩაითვალა საჭიროდ, რომ საგანს ნებისმიერი მიმართულებით რაიმე დაემატოს, სახელმწიფოს შესაბამისი ცვლილებების განხორციელების აბსოლუტური მზაობა აქვს.