თამარ მახარაშვილი: განათლების სამინისტრო 2026-27 სასწავლო წელს ძალიან ბევრი სიახლით ხვდება. პირველად მოხდა, როდესაც სისტემაში საყოველთაო რეგისტრაციამდე, პირველკლასელთა რეგისტრაციას ტერიტორიული პრინციპით რეგისტრაცია დაემატა

განათლების სამინისტრო 2026-27 სასწავლო წელს ძალიან ბევრი სიახლით ხვდება, - განაცხადა გადაცემაში „დღის ქრონიკა“ განათლების, მეცნიერებისა და ახალგაზრდობის მინისტრის მოადგილე თამარ მახარაშვილმა.

მინისტრის მოადგილის თქმით, პირველად მოხდა, როდესაც სისტემაში საყოველთაო რეგისტრაციამდე, პირველკლასელთა რეგისტრაციას ტერიტორიული პრინციპით რეგისტრაცია დაემატა.

„ძალიან დიდი დღეა ნამდვილად ჩვენთვის, ყველასთვის, მთელი საქართველოსთვის. ვისარგებლებ შემთხვევით და სრულიად საქართველოს ახალი სასწავლო წლის დაწყებას მივულოცავ. 600 ათასზე მეტი მოსწავლე შევიდა დღეს სკოლებში და აქედან 45 ათასი პირველკლასელი. მოდით, შევთანხმდეთ, რომ ყველაზე ლამაზები სწორედ პირველკლასელები იყვნენ. ყველაზე მეტს ისინი ღელავდნენ, მაგრამ იყვნენ ულამაზესები, სასკოლო ფორმაში ჩაცმულები და მათთვის ცხოვრების ახალი გზა დაიწყო.

განათლების სამინისტრო 2026-27 სასწავლო წელს ძალიან ბევრი სიახლით ხვდება. პირველად მოხდა, როდესაც სისტემაში საყოველთაო რეგისტრაციამდე პირველკლასელთა რეგისტრაციას დაემატა ტერიტორიული პრინციპით რეგისტრაცია. სიახლეა ის, რომ სასკოლო ფორმები დაწყებით საფეხურზე უზრუნველყოფილი უნდა იყოს და შესაბამისად, დაწყებით საფეხურზე სავალდებულო გახდა სწორედ 2026 წლისთვის შესაბამისი ფორმები. მნიშვნელოვანი გახლავთ ის გარემოებაც, რომ მობილური ტელეფონების, ჭკვიანი საათების გამოყენების წესი დარეგულირდა, რათა სასწავლო პროცესი სწავლაზე იყოს ორიენტირებული. მნიშვნელოვანი შინაარსობრივი სიახლე გახლავთ ის, რომ ახალი სასწავლო გეგმა დამტკიცდა, ახალი სტანდარტი დამტკიცდა, რასაც წამოჰყვა სახელმძღვანელოების თემა. 2026 წელს პირველ, მეშვიდე და მეათე კლასებში ახალი სახელმძღვანელოები შევიდა“, - აღნიშნა მან.