გივი მიქანაძემ პროფესიული კოლეჯის სტუდენტებს ახალი სასწავლო წლის დაწყება მიულოცა
საზოგადოება
ფოტო: განათლების და მეცნიერების სამინისტრო
საქართველოს განათლების, მეცნიერებისა და ახალგაზრდობის მინისტრმა გივი მიქანაძემ რუსთავში კოლეჯ „მოდუსის“ სტუდენტებს, მასწავლებლებსა და ადმინისტრაციის წარმომადგენლებს ახალი სასწავლო წლის დაწყება მიულოცა და მათ წარმატებული და ნაყოფიერი სასწავლო წელი უსურვა.
გივი მიქანაძემ „მოდუსის“ საქმიანობისა და მიღწევების მნიშვნელობაზე ილაპარაკა და აღნიშნა, რომ დაწესებულება ერთ-ერთი წარმატებული კოლეჯია, რომელიც სტუდენტებს მრავალფეროვან და შრომის ბაზრის მოთხოვნილებაზე მორგებულ საგანმანათლებლო პროგრამებს სთავაზობს.
მინისტრმა ხაზი გაუსვა პროფესიული განათლების განსაკუთრებულ როლს ქვეყნის ეკონომიკური და სოციალური განვითარების პროცესში. მისი თქმით, პროფესიულ საგანმანათლებლო დაწესებულებებს მნიშვნელოვანი წვლილი მიუძღვით შრომის ბაზრის მოთხოვნილების შესაბამისი კვალიფიციური კადრების მომზადებაში.
მინისტრთან ერთად, კოლეჯის სტუდენტებსა და ადმინისტრაციას ახალი სასწავლო წლის დაწყება მიულოცეს ქვემო ქართლის სახელმწიფო რწმუნებულმა ილია ჯალაღანიამ, ქალაქ რუსთავის მერმა ნინო ლაცაბიძემ და ქალაქ რუსთავის საკრებულოს თავმჯდომარემ მამუკა რეხვიაშვილმა.
კოლეჯი „მოდუსი“ წლის განმავლობაში 1000-ზე მეტ სტუდენტსა და მსმენელს ემსახურება და ქვემო ქართლის რეგიონის ორ ადგილას – რუსთავსა და მარნეულში ფუნქციონირებს, სადაც ჯამში 24 დასახელების პროფესიულ საგანმანათლებლო პროგრამას უძღვება. მათ შორის პროგრამებს, რომლებშიც ინტეგრირებულია ზოგადი განათლების საშუალო საფეხურის სწავლის შედეგები.
კოლეჯი თანამშრომლობს პენიტენციურ დაწესებულებებთან, სადაც ყოველწლიურად 100-ზე მეტი პატიმარი გადის მომზადებას 5 სხვადასხვა დარგის პროგრამაზე და ეუფლება პროფესიას.
ინფორმაციას განათლებისა და მეცნიერების სამინისტრო ავრცელებს.
