გივი მიქანაძე: მთავრობის მეთაურის გადაწყვეტილების საფუძველზე, 14 სექტემბრიდან 18 სექტემბრის ჩათვლით გაიხსნება ბაზები მეორად ჩარიცხვებთან დაკავშირებით, რომლითაც ახალგაზრდებს შეეძლებათ, რომ სხვადასხვა ადგილას დარეგისტრირდნენ

14 სექტემბრიდან გაიხსნება ბაზები მეორად ჩარიცხვებთან დაკავშირებით. გამონაკლისი დაიშვა, გადაწყვეტილება მიიღო მთავრობის მეთაურმა, რომ წელს, რადგან პირველი წელიწადია ამ რეფორმის, გავითვალისწინეთ ეს გარემოება და აპლიკანტებს მივეცით შესაძლებლობა, რომ მოხვდნენ სასურველ უნივერსიტეტებში, - განაცხადა გადაცემაში „ღია ეთერი“ საქართველოს განათლების, მეცნიერებისა და ახალგაზრდობის მინისტრმა გივი მიქანაძემ.

მისივე თქმით, ზუსტად 1 795 ადამიანია, რომელთაც ის ბარიერი გადალახეს, თუმცა მათ არ ეყოთ ქულები, რომ მათ მიერ შერჩეულ უნივერსიტეტებში მოხვედრილიყვნენ.

„ჩვენ გავითვალისწინეთ ეს გარემოება და სწორედ ამ გადაწყვეტილების საფუძველზე, 14 სექტემბრიდან 18 სექტემბრის ჩათვლით, გაიხსნება ბაზები, რომლითაც ამ 1 795 ახალგაზრდას შეეძლება, რომ სხვადასხვა ადგილას დარეგისტრირდეს. ის, რომ სადღაც დარეგისტრირდა, არ ნიშნავს აპრიორი, რომ იქ აუცილებლად მოხვდეს. კონკურენციაა, შეიძლება მასზე ცოტათი მეტი ქულის მქონე აპლიკანტმა აჯობოს. მოვუწოდებ ახალგაზრდებს, რომ, რაც შეიძლება, მეტი სპეციალობა აირჩიონ, მათ შორის პროფესიულიც.

პრემიერ მინისტრთან კონსულტაციით, 2 000-ზე მეტი ახალგაზრდაა, რომელსაც ქულები არ ეყოთ სხვადასხვა უმაღლეს სასწავლებლებში მოსახვედრად, მაგრამ მათ არ აურჩევიათ პროფესიული სასწავლებლები და ის მინიმალური ბარიერი გადალახეს, მათთვისაც იხსნება ბაზები და თუ სურვილი აქვთ, რომ მათ მიერ შემოხაზულ პროფესიულ სასწავლებელში ჩაირიცხონ, შეუძლიათ დარეგისტრირდნენ. წელს გვქონდა პირველად ეს შემთხვევა, რომ კვოტები, რომლებიც განისაზღვრა უნივერსიტეტებში, ამას დაემატა 10 600 უფასო ადგილი პროფესიულ სასწავლებლებში. ამ ეტაპზე დაახლოებით 7 000 ადგილის რესურსი გვაქვს.

მით უმეტეს, ესენი არიან ადამიანები, რომლებმაც გარკვეული კომპეტენციები დაადასტურეს ამ გამოცდების შედეგად, თუმცა მათ პროფესიული არ ჰქონდათ შემოხაზული, ამიტომ მათაც ვაძლევთ შესაძლებლობას, რომ თუ სურვილი აქვთ, შეუძლიათ აირჩიონ პროფესიული სასწავლებელი და სწავლა დაიწყონ სექტემბრიდან “, - აღნიშნა მინისტრმა.