სამცხე-ჯავახეთის სახელმწიფო უნივერსიტეტში საქართველოს ეკონომისტთა რიგით მე-8 ეროვნული სამეცნიერო კონფერენცია გაიმართა

სამცხე-ჯავახეთის სახელმწიფო უნივერსიტეტში გაიმართა საქართველოს ეკონომისტთა რიგით მე-8 ეროვნული სამეცნიერო კონფერენცია, რომელშიც საქართველოს განათლების, მეცნიერებისა და ახალგაზრდობის მინისტრი გივი მიქანაძე მონაწილეობდა.

სამინისტროს ინფორმაციით, მინისტრმა სიტყვით გამოსვლისას ყურადღება გაამახვილა მსოფლიოში მიმდინარე ეკონომიკურ პროცესებზე, საქართველოს წინაშე არსებულ გამოწვევებსა და იმ შესაძლებლობებზე, რომლებიც ქვეყნის ეკონომიკურ განვითარებას შეუწყობს ხელს.

როგორც გივი მიქანაძემ აღნიშნა, საქართველოს გეოგრაფიული მდებარეობა ქვეყანას მნიშვნელოვან სტრატეგიულ უპირატესობას ანიჭებს და განვითარებისათვის უდიდესი პოტენციალის შექმნის შესაძლებლობას იძლევა.

„შუა დერეფნის განვითარება საქართველოსთვის არაერთ ახალ შესაძლებლობას გააჩენს. ამ შესაძლებლობების სრულად გამოყენებისთვის კი, სატრანსპორტო და სხვა ინფრასტრუქტურის განვითარებასთან ერთად, განსაკუთრებული მნიშვნელობა ენიჭება ცოდნას, ტექნოლოგიურ პროგრესს, ინოვაციებსა და ადამიანური კაპიტალის გაძლიერებას. ამ მიმართულებით მინდა, გამოვყო რეგიონული უნივერსიტეტების მნიშვნელობა, ვინაიდან მათ უდიდესი წვლილი მიუძღვით რეგიონის სოციალურ-ეკონომიკურ განვითარებაში.

ჩვენი მიზანია, რეგიონულ უნივერსიტეტებს მაქსიმალურად შევუყოთ ხელი თანამედროვე ცოდნის გავრცელებაში, კვლევითი საქმიანობის გაძლიერებასა და საერთაშორისო კავშირების გაღრმავებაში. სწორედ ამას ემსახურება უმაღლესი განათლების საფეხურზე მიმდინარე ეროვნული რეფორმა“, - განაცხადა გივი მიქანაძემ.

კონფერენცია საქართველოს მეცნიერებათა ეროვნული აკადემიის დაარსებიდან 85 წლის იუბილეს მიეძღვნა. ღონისძიებაში ასევე მონაწილეობდნენ საქართველოს განათლების, მეცნიერებისა და ახალგაზრდობის მინისტრის მოადგილე ზვიად გაბისონია, ადგილობრივი ხელისუფლების წარმომადგენლები, საქართველოს მეცნიერებათა ეროვნული აკადემიის წევრები, უმაღლესი საგანმანათლებლო დაწესებულებების აკადემიური პერსონალი, სამეცნიერო-კვლევითი ინსტიტუტების მეცნიერ-თანამშრომლები, ახალგაზრდა მკვლევრები და დარგის წამყვანი ექსპერტები.