ეროვნულმა ბანკმა ფინანსური განათლების ეროვნული ჯილდო 2026-ის გამარჯვებული მასწავლებელი გამოავლინა

საქართველოს ეროვნულმა ბანკმა ფინანსური განათლების ეროვნული ჯილდოს პირველი გამარჯვებული გამოავლინა.

ეროვნული ბანკის ინფორმაციით, ჯილდოს მფლობელი გახდა ამირან ხიმშიაშვილი, სსიპ შუახევის მუნიციპალიტეტის სოფელ დაბაძველის საჯარო სკოლის მოქალაქეობის მასწავლებელი.

ფინანსური განათლების ეროვნული ჯილდო ყოველწლიური კონკურსია, რომელიც გასულ წელს საქართველოს ეროვნული ბანკის ფინანსური განათლების პლატფორმა „ფინედუს“ ინიციატივითა და ბაზისბანკის მხარდაჭერით დაარსდა. მისი მიზანია სკოლებში ფინანსური განათლების გაძლიერება, სწავლების ხარისხის ამაღლება ინოვაციური მიდგომის გამოყენებით და იმ მასწავლებლების გამოვლენა და აღიარება, რომლებიც მოსწავლეებსა და სასკოლო საზოგადოებაში ფინანსური განათლების პოპულარიზაციაში განსაკუთრებულ წვლილს შეიტანენ.

2025-2026 სასწავლო წლის განმავლობაში კონკურსის მონაწილეებს შესაძლებლობა ჰქონდათ, ფინანსური განათლების ხელშეწყობის მიზნით, ჩაეტარებინათ გაკვეთილები და შეექმნათ პროექტები, სასწავლო რესურსები და დაენერგათ ინოვაციური მიდგომა ფინანსური განათლების სწავლების პროცესში. კონკურსის ფინალურ ეტაპზე ხუთი მასწავლებელი გადავიდა.

გამარჯვებული ჟიურიმ წინასწარ განსაზღვრული კრიტერიუმების საფუძველზე გამოავლინა. შეფასებისას გათვალისწინებული იყო ჩატარებული ღონისძიებების შესაბამისობა ფინანსური განათლების მიზნებთან, შემოქმედებითი და ინოვაციური მიდგომა, მოსწავლეთა ჩართულობა და მიღწეული შედეგები. ჟიურის შემადგენლობაში იყვნენ საქართველოს ეროვნული ბანკის, ბაზისბანკის, საქართველოს განათლების, მეცნიერებისა და ახალგაზრდობის სამინისტროსა და აკადემიური სფეროს წარმომადგენლები. გამარჯვებულ მასწავლებელს ბაზისბანკისგან 5,000 ლარის ფულადი პრიზი გადაეცა.

დაჯილდოების ღონისძიებას ესწრებოდნენ საქართველოს ეროვნული ბანკის პირველი ვიცე-პრეზიდენტი ეკატერინე მიქაბაძე, საქართველოს განათლების, მეცნიერების და ახალგაზრდობის მინისტრის მოადგილე ლევან ღირსიაშვილი და საქართველოს კონკურენციისა და მომხმარებლის დაცვის სააგენტოს თავმჯდომარე ირაკლი ლექვინაძე. ღონისძიების ფარგლებში მათ ხაზი გაუსვეს ფინანსური განათლების სკოლებში გაძლიერების მნიშვნელობას და ამ მხრივ უწყებებსა და საფინანსო სექტორს შორის თანამშრომლობის გაგრძელებისა და მხარდაჭერისთვის მზადყოფნას.

ფინანსური განათლების ეროვნული ჯილდოთი დაჯილდოება გაიმართა კონფერენციის „ფინანსური განათლება სკოლებში: იდეიდან საკლასო ოთახამდე“ ფარგლებში. კონფერენცია მიზნად ისახავდა სკოლებში ფინანსური განათლების გაძლიერების ხელშეწყობას სხვადასხვა დაინტერესებულ მხარეს შორის თანამშრომლობის, გამოცდილებისა და საუკეთესო პრაქტიკის გაზიარებისა და მასწავლებელთა პრაქტიკული მხარდაჭერის გზით.

კონფერენციაში მონაწილეობდნენ მასწავლებლები, განათლების სფეროს, საჯარო და საფინანსო სექტორის წარმომადგენლები. მონაწილეებმა იმსჯელეს ფინანსური განათლების ეროვნულ ხედვაზე, სკოლებში მისი ინტეგრირების შესაძლებლობებზე, მასწავლებლებისთვის ხელმისაწვდომ პროგრამებსა და რესურსებზე და საფინანსო სექტორის როლზე მომავალი თაობის ფინანსური განათლების მხარდაჭერაში.

კონფერენციის პრაქტიკული ნაწილი მასწავლებელთა გამოცდილებისა და წარმატებული პრაქტიკის გაზიარებას დაეთმო. სემინარების ფარგლებში მონაწილეებმა იმუშავეს ფინანსური განათლების პრაქტიკული სწავლების, სხვადასხვა საგანში მისი ინტეგრირების, პროექტზე დაფუძნებული სწავლებისა და ციფრული ტექნოლოგიების გამოყენების საკითხებზე.

ფინანსური განათლების ეროვნული ჯილდოს მომდევნო კონკურსი, რომელიც 2026-2027 სასწავლო წელს ჩატარებული საქმიანობის შესაბამისად გამოავლენს გამარჯვებულს, უახლოეს პერიოდში გამოცხადდება.