გარემოს ეროვნულ სააგენტოსა და კრიოსფეროს ფონდს შორის ურთიერთთანამშრომლობის მემორანდუმი გაფორმდა

გარემოს დაცვისა და სოფლის მეურნეობის სამინისტროს გარემოს ეროვნულ სააგენტოსა და კრიოსფეროს ფონდს შორის ურთიერთთანამშრომლობის მემორანდუმი გაფორმდა.

სამინისტროს ინფორმაციით, თანამშრომლობის მიზანია საქართველოს საერთაშორისო ანტარქტიდულ და კრიოსფერულ სამეცნიერო საქმიანობაში ჩართვის ხელშეწყობა და ამ მხრივ სამეცნიერო შესაძლებლობების გაძლიერება.

მემორანდუმს ხელი მოაწერეს სააგენტოს უფროსმა ელენე ღუბიანურმა და კრიოსფეროს ფონდის მრჩეველმა რობინ ვუდჰედმა.

მემორანდუმის ფარგლებში თანამშრომლობა ითვალისწინებს ერთობლივ სამეცნიერო კვლევებს, საერთაშორისო პროექტებსა და სამეცნიერო ღონისძიებებში მონაწილეობას, მკვლევართა გაცვლას, ასევე ანტარქტიდის კვლევების სამეცნიერო კომიტეტში (SCAR) საქართველოს გაწევრიანების მხარდაჭერას.

„ჩვენი ქვეყნისთვის, სადაც კავკასიონის უნიკალური მყინვარები მდებარეობს, განსაკუთრებით პრიორიტეტულია კლიმატურ ცვლილებებთან ადაპტაცია და ამ კუთხით სამეცნიერო ცოდნის გაღრმავება.

დღეს, როდესაც მსოფლიო დგას კლიმატის გლობალური ცვლილებებისა და მყინვარების სწრაფი დნობის გამოწვევების წინაშე, საერთაშორისო სამეცნიერო თანამშრომლობას გადამწყვეტი მნიშვნელობა ენიჭება და მჯერა, ეს თანამშრომლობა საფუძველს ჩაუყრის ახალ, მასშტაბურ სამეცნიერო მიღწევებს“, - აღნიშნა გარემოს ეროვნული სააგენტოს უფროსმა ელენე ღუბიანურმა.

აღნიშნული ფონდი კრიოსფეროს სამეცნიერო კვლევების მხარდაჭერაზე მუშაობს. ფონდთან თანამშრომლობა ხელს შეუწყობს საქართველოში გლაციოლოგიური კვლევების განვითარებას და საერთაშორისო სამეცნიერო თანამშრომლობის გაძლიერებას.