პროკურორი: ფსიქოტროპული ნივთიერების შესაძენად ყალბი რეცეპტის დამზადების ფაქტზე ბრალდებული ექიმი წარსულშიც იმავე დანაშაულისთვის არის ნასამართლევი

ბრალდებული ექიმის მაია კოხტაშვილის საქმის პროკურორი მანანა თანდაშვილი აცხადებს, რომ ბრალდებული იმავე სახის დანაშაულისთვის ადრეც არის ნასამართლევი. მისი თქმით, 2023 წელს იგი თელავის რაიონულმა სასამართლომ, სამსახურებრივი მდგომარეობის გამოყენებით, ფსიქოტროპული ნივთიერების შესაძენად ყალბი რეცეპტის გასაღების მიზნით დამზადებისა და გასაღების ფაქტზე დამნაშავედ ცნო.

პროკურორის თქმით, სისხლის სამართლის საქმეზე გამოძიება გრძელდება; შესაძლოა დადგინდეს ბრალდებულის მიერ ჩადენილი სხვა დანაშაულებრივი ეპიზოდებიც, მასთან დანაშაულებრივ კავშირში მყოფი პირები და გაიზარდოს ბრალდებულთა წრე. ასევე დამძიმდეს ბრალდებულის კვალიფიკაცია.

კითხვაზე, რა მატერიალური მოტივი ამოძრავებდა ბრალდებულს, რადგან თვითონ აცხადებს, რომ ასაკოვანი ქალი შეეცოდა, პროკურორმა განმარტა, რომ, მიუხედავად იმისა, რომ ბრალდებულმა ასე განაცხადა სასამართლოში, საქმის მასალებსა და ოპერატიულ მასალაში ბრალდებული ამბობს, რომ ყოველი რეგისტრირებული პაციენტის მიერ გადახდილი თანხიდან იგი გარკვეულ პროცენტს იღებს. ასევე ბრალდებულისთვის წარდგენილი 268-ე მუხლის დისპოზიცია არ მოითხოვს რაიმე მატერიალური სარგებლის არსებობას. ეს დანაშაული მთავრდება იმ მომენტიდან, როდესაც მან რეცეპტი გამოწერა გასაღების მიზნით, მოცემულ შემთხვევაში კი გაასაღა.

რაც შეეხება საქმეში აგენტ-პროვოკატორის არსებობას, პროკურორის განმარტებით, სისხლის სამართლის საქმეში არსებული მტკიცებულებებით რაიმე პროვოკაციის ფაქტი არ დასტურდება. მისი თქმით, თავად დაცვის მხარე სრულად დაეთანხმა ბრალდებას. ბრალდებულმა აღიარა დანაშაული სასამართლო პროცესზე, რასაც დაეთანხმნენ ადვოკატები და მათი მხრიდანაც გამოირიცხა რაიმე პროვოკაციის არსებობის ფაქტი. ხოლო საქმეში ოპერატიულად ჩართული პირი მოქმედებდა სასამართლოს განჩინებისა და ნებართვის საფუძველზე, რომლის ფარგლებშიც ჩატარდა ფარული საგამოძიებო მოქმედებები.