აჭარის უმაღლეს საბჭოში ექვსივე მუნიციპალიტეტის დელეგატებმა მოქალაქეებთან ერთობლივი შეხვედრა გამართეს

აჭარის უმაღლესი საბჭოს თავმჯდომარე ცოტნე ანანიძე, მუნიციპალიტეტების დელეგატებთან ერთად, რეგიონში მცხოვრებ მოქალაქეებს შეხვდა, - ინფორმაციას აჭარის უმაღლესი საბჭო ავრცელებს.

უწყების ცნობით, კანონმდებლებმა რეგიონის მცხოვრებლების საჭიროებების შესახებ ინფორმაცია უშუალო დიალოგის დროს მოისმინეს. ჯანდაცვა, სოციალური სფერო, დასაქმება, ინფრასტრუქტურა, ეს იმ საკითხთა არასრული ჩამონათვალია, რომელთა მოგვარებაში მოქალაქეები მხარდაჭერას ითხოვენ.

„აღსანიშნავია, რომ მოქალაქეთა მიღება საკანონმდებლო ორგანოში ინტენსიურად მიმდინარეობს. თუმცა მსგავსი ფორმატის შეხვედრა, სადაც უმაღლესი საბჭოს თავმჯდომარემ და ექვსივე მუნიციპალიტეტის დელეგატებმა, თემატური დიფერენციაციის გარეშე, ერთდროულად მოუსმინეს მოქალაქეებს, პირველად გაიმართა.

აჭარის უმაღლესი საბჭოს თავმჯდომარის ცოტნე ანანიძის განცხადებით, მსგავსი ფორმატის შეხვედრები საკანონმდებლო ორგანოში გაგრძელდება და სისტემატურად გაიმართება.

უმაღლესი საბჭოს წევრებმა მოსახლეობის საჭიროებები ჩაინიშნეს და კომპეტენციის ფარგლებში შესაბამის უწყებებთან შუამდგომლობას დაჰპირდნენ. შეხვედრას ესწრებოდნენ ქალაქ ბათუმის დელეგატი აჭარის უმაღლეს საბჭოში - რამაზ ჯინჭარაძე, ქობულეთის დელეგატი - ცოტნე ანანიძე, ხელვაჩაურის დელეგატი - მინდია დიასამიძე, ქედის დელეგატი - ნადიმ ვარშანიძე, შუახევის დელეგატი - ფრიდონ ფუტკარაძე, ხულოს დელეგატი - მინურ პაქსაძე“, - აღნიშნულია გავრცელებულ ინფორმაციაში.