ახალციხის მუნიციპალიტეტის მერმა ვარლამ წიკლაურმა ევროპის საბჭოს ადგილობრივ და რეგიონულ ხელისუფლებათა კონგრესის 51-ე სესიაში მიიღო მონაწილეობა

ახალციხის მუნიციპალიტეტის მერმა ვარლამ წიკლაურმა ევროპის საბჭოს ადგილობრივ და რეგიონულ ხელისუფლებათა კონგრესის 51-ე სესიაში მიიღო მონაწილეობა, - ინფორმაციას ახალციხის მუნიციპალიტეტის მერია ავრცელებს.

უწყების ცნობით, სესიაზე მონაწილეებმა ადგილობრივი და რეგიონული ხელისუფლების საქმიანობასთან დაკავშირებულ საკითხებზე იმსჯელეს, რომლის ფარგლებშიც რამდენიმე მნიშვნელოვანი რეზოლუცია და რეკომენდაცია დამტკიცდა. დელეგატებმა ასევე განიხილეს საკითხები კრიზისების დროს ადგილობრივი მდგრადობის დაფინანსების, სოფლებიდან მოსახლეობის გადინებისა და ტრანსსასაზღვრო თანამშრომლობის შესახებ.

„სესიის ფარგლებში, 27 ოქტომბერს, გაიმართა სტატუსური კომიტეტების შეხვედრებიც, სადაც მონაწილეებმა კომპეტენციის ფარგლებში იმსჯელეს მუნიციპალური განვითარებისა და ადგილობრივი დემოკრატიის აქტუალურ საკითხებზე.

სტრასბურგში ევროპის საბჭოს ადგილობრივ და რეგიონულ ხელისუფლებათა კონგრესის 51-ე სესია 27-29 ოქტომბერს გაიმართა, რომელშიც ჩართულები იყვნენ ქართველი დელეგატები - ქალაქ თბილისის საკრებულოს წევრი, დელეგაციის ხელმძღვანელის მოადგილე ნინო ვარდოსანიძე, ახალციხის მუნიციპალიტეტის მერი ვარლამ წიკლაური, ქალაქ ფოთის მერი ბექა ვაჭარაძე და აჭარის უმაღლესი საბჭოს წევრი გოგი ფუტკარაძე“, - აღნიშნულია გავრცელებულ ინფორმაციაში.