რევაზ სოხაძე: ქუთაისი მართლაც ძალიან მნიშვნელოვანი ქალაქია და ჩვენი მთავრობა ძალიან ბევრ პროექტს ახორციელებს და გეგმავს ქუთაისში - თანამედროვე ტექნოლოგიების ჰაბის მიმდებარე ტერიტორიაზე უზარმაზარი რეკრეაციული სივრცე კეთდება, რაც ძალიან მნიშვნელოვანი იქნება ამ რეგიონისთვის. აქვე, მიმდებარე ტერიტორიაზე სპორტის სასახლე უნდა აშენდეს

ქუთაისი მართლაც ძალიან მნიშვნელოვანი ქალაქია და ჩვენი მთავრობა, ხელისუფლება ძალიან ბევრ პროექტს ახორციელებს და გეგმავს ქუთაისში, - განაცხადა გადაცემაში „ღია ეთერში“ რეგიონული განვითარებისა და ინფრასტრუქტურის მინისტრმა რევაზ სოხაძემ.

მან სანიაღვრე და საკანალიზაციო სისტემებზე, ასევე ქალაქში დაგეგმილ სხვადასხვა პროექტზე ილაპარაკა.

„რაც შეეხება სანიაღვრე სისტემებს, ბევრი პრობლემა, რომელიც იყო დასახელებული, ადგილობრივი თვითმმართველობის კომპეტენციას განეკუთვნება. თუმცა, არ ვიხსნით პასუხისმგებლობას და ამ პროცესებში აქტიურად ჩავერთვებით. მოქალაქისთვის მთავარია, რომ ეს პრობლემა მოგვარდეს და ვინ მოაგვარებს, ამას არ აქვს არსებითი მნიშვნელობა.

საკანალიზაციო სისტემებზეც იყო ლაპარაკი. ჩემი მოადგილის, გიორგი კობერიძის ინიციატივა იყო და ეს არის ნამდვილად სწორი და პროფესიული მიდგომა, რომ პრემიერის დავალებით, როგორც აღვნიშნე, ყველა ქალაქსა და დაბაში უნდა გავაკეთოთ საკანალიზაციო სისტემები. პარალელურად, აუცილებლად უნდა გაკეთდეს სანიაღვრე სისტემები იმიტომ, რომ სხვა შემთხვევაში თავად საკანალიზაციო სისტემების მუშაობას ექმნება საფრთხე. ამიტომ ჩვენ სადაც შევალთ, საფუძვლიანად შევალთ, საფუძვლიანად გავაკეთებთ კანალიზაციას და ქუთაისში, მათ შორის დონორების დაფინანსებით, უახლოეს პერიოდში უნდა დავიწყოთ საკანალიზაციო სისტემების მოწესრიგება. გამწმენდ ნაგებობაზე უკვე გამოვლენილია კონსორციუმი, უახლოეს პერიოდში მშენებლობა დაიწყება და ბუნებრივია, მოვაწესრიგებთ სანიაღვრე სისტემასაც.

ქუთაისში თანამედროვე ტექნოლოგიების ჰაბის, ყოფილი პარლამენტის მიმდებარე ტერიტორიაზე უზარმაზარი რეკრეაციული სივრცე კეთდება, რაც ძალიან მნიშვნელოვანი იქნება ამ რეგიონისთვის. აქვე, მიმდებარე ტერიტორიაზე სპორტის სასახლე უნდა აშენდეს. ახლა მიმდინარეობს რამდენიმე რეკრეაციული სივრცის მოწესრიგება, - განაცხადა მინისტრმა.

მან ქუთაისის ბიბლიოთეკის შესახებაც ილაპარაკა.

„ძალიან საინტერესო ბიბლიოთეკა აქვთ როგორც ფონდის თვალსაზრისით, ასევე შენობაც უნიკალურია. მუნიციპალური განვითარების ფონდმა უკვე დაიწყო ამ შენობის რეაბილიტაცია, კონტრაქტორი მუშაობს. გვაქვს გარკვეული პრობლემები კომერციულ ფართებთან დაკავშირებით. თუმცა ამასაც მოვაგვარებთ. მე კარგად მახსოვს დირექტორის სიტყვები, რომ ძალიან ბევრი მომხმარებელი ჰყავს ამ ბიბლიოთეკას და ეს ჩვენთვის დამატებითი სტიმული იყო იმისათვის, რომ რაც შეიძლება, სწრაფად და ხარისხიანად გავაკეთოთ ეს პროექტი, - აღნიშნა რევაზ სოხაძემ.

მინისტრმა ოფშკვითის სკოლის შესახებ თქვა, რომ განათლების სამინისტროს ძველ კონტრაქტორთან გარკვეული დავა აქვს.

„თუმცა წლის დასაწყისში დავიწყებთ ამ სკოლის მშენებლობის პროცესს“, - დასძინა მინისტრმა.