გიორგი ჩაკვეტაძე: საქართველოს მთავრობა და პარლამენტი კოორდინირებულად მუშაობენ ჩვენი ქვეყნის წინსვლისთვის

პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარის პირველმა მოადგილემ გიორგი ჩაკვეტაძემ პარლამენტის პლენარულ სხდომაზე მეცნიერების სფეროში ჩართულ ადამიანებს მეცნიერების საერთაშორისო დღე მიულოცა და აღნიშნა, რომ ხელისუფლება ყველაფერს აკეთებს ქართული მეცნიერების მხარდასაჭერად.

„გადამუშავებულ ვერსიაში 2027 წლის სახელმწიფო ბიუჯეტი, პირველად ვარიანტთან შედარებით, 642 მილიონი ლარით არის გაზრდილი და მისი საერთო მოცულობა 38 მილიარდ 363 მილიონ ლარს შეადგენს.

გათვალისწინებულია თითქმის ყველა რეკომენდაცია, რაც პარლამენტში შემოვიდა. ეს მხოლოდ ერთ რამეს ადასტურებს - საქართველოს მთავრობა და პარლამენტი კოორდინირებულად მუშაობენ ჩვენი ქვეყნის წინსვლისთვის. მთავარი საფინანსო დოკუმენტით იზრდება სოციალური და ჯანმრთელობის დაცვის პროგრამებისთვის განკუთვნილი ხარჯები. იმატებს პენსიები და ხელფასები საჯარო სექტორში“, - განაცხადა გიორგი ჩაკვეტაძემ.

მისი თქმით, 2027 წლის სახელმწიფო ბიუჯეტის ახალ ვერსიაში განათლების, მეცნიერებისა და ახალგაზრდობის სამინისტროს დაფინანსება 73 მილიონი ლარით არის გაზრდილი და 3 მილიარდ ლარს შეადგენს.

„საგანმანათლებლო ინფრასტრუქტურისა და მოსწავლეთა ტრანსპორტირების თანხები რეგიონული განვითარებისა და ინფრასტრუქტურის სამინისტროს ასიგნებებშია მოცემული, რისი გათვალისწინებითაც, 2027 წელს მთლიანად სექტორის დაფინანსება 3 მილიარდ 709 მილიონ ლარზე მეტი იქნება.

სკოლამდელი და ზოგადი განათლება – 2 მილიარდ 99 მილიონი ლარია დაფინანსება და პირველად რედაქციას 16 მილიონი ლარით აღემატება.

გათვალისწინებულია საჯარო სკოლების მასწავლებლებისა და ადმინისტრაციული პერსონალის ხელფასების ზრდა. გარდა ამისა, მომდევნო წლის სექტემბრიდან სადამრიგებლო დანამატი გაორმაგდება. ხელფასები გაიზრდება საბავშვო ბაგა-ბაღებშიც და ამ მხრივ სისტემური მიდგომა ჩამოყალიბდება.

ინკლუზიური განათლების დაფინანსება 138 მილიონ ლარს შეადგენს. იგეგმება შესაბამისი უნარების მქონე პედაგოგთა რაოდენობისა და ხელფასების ზრდა. პროფესიული განათლების დაფინანსება 263 მილიონი ლარი იქნება. სასკოლო და საუნივერსიტეტო რეფორმასთან ერთად, დაგეგმილია აღნიშნული სფეროს რეფორმირებაც.
უმაღლესი განათლება დაფინანსდება 266 მილიონი ლარით. აქედან, 105 მილიონი ლარით დაფინანსდება უმაღლესი განათლების რეფორმა, რომლითაც სახელმწიფო უნივერსიტეტებში სწავლა უფასო გახდა.

მეცნიერებისა და სამეცნიერო კვლევების ხელშეწყობა – დაფინანსდება 97 მილიონი ლარით. მხოლოდ წელს მეცნიერებაში 6 ახალი პროგრამის განხორციელება დაიწყო, რაც მის პოპულარიზაციას კიდევ უფრო მეტად შეუწყობს ხელს. ჩვენი მიზანია სამეცნიერო სამყარო უფრო დავაახლოოთ საზოგადოებასთან, თვალსაჩინო იყოს მეცნიერების შრომა და ახალგაზრდებში პოპულარიზაცია.
ახალგაზრდობის მხარდაჭერა დაფინანსდება 26,5 მილიონი ლარით. ეს მეტ ახალგაზრდულ პროგრამას, სივრცესა და პროექტს გულისხმობს“, - აღნიშნა გიორგი ჩაკვეტაძემ.