ლევან მახაშვილი: რაც ნამდვილად არანორმალური და ყოველთვის მიუღებელია, არის ის, რომ როდესაც საქართველო ცდილობს საკუთარი ქვეყნისა და საზოგადოების დაცვას, ამაში ვიღებთ აბსოლუტურად გაუგებარ და ბუნდოვან კრიტიკას იმ სახელმწიფოების მხრიდან, რომლებიც თავად იღებენ ჩვენზე ბევრად მკაცრ გადაწყვეტილებებს

„ქართულ ოცნებაში“ საფრანგეთში უცხოურ გავლენებთან და ჩარევებთან ბრძოლის გამკაცრებას აფასებენ. ევროპასთან ინტეგრაციის საპარლამენტო კომიტეტის თავმჯდომარემ ლევან მახაშვილმა აღნიშნა, რომ ამ გადმოსახედიდან გაუგებარია ევროპული ქვეყნების კრიტიკა საქართველოს მიმართ, რომელიც ასევე ცდილობს საკუთარი ინტერესების დაცვას.

„როდესაც მათი ქვეყანა დგება ამ გამოწვევების წინაშე, იღებენ თუნდაც ძალიან მკაცრ გადაწყვეტილებებს და ეს ნორმალურია, იმიტომ რომ ყველა ქვეყანა ცდილობს საკუთარი სახელმწიფოსა და საზოგადოების დაცვას. ეს ერთი. მეორე მხრივ, რაც ნამდვილად არანორმალური და ყოველთვის მიუღებელია, არის ის, რომ როდესაც იგივეს აკეთებს საქართველო - ცდილობს საკუთარი ქვეყნისა და საზოგადოების დაცვას, ამაში ვიღებთ აბსოლუტურად გაუგებარ და ბუნდოვან კრიტიკას იმ სახელმწიფოების მხრიდან, რომლებიც თავად იღებენ ჩვენზე ბევრად მკაცრ გადაწყვეტილებებს“, - აცხადებს მახაშვილი.