თორნიკე ჭეიშვილი: მხოლოდ და მხოლოდ სარგებლის მომტანი შეიძლება იყოს ეს ერთგვარი თვითწმენდის პროცესი, რომელსაც ახლა ჩვენ თვალს ვადევნებთ

მხოლოდ და მხოლოდ სარგებლის მომტანი შეიძლება იყოს ეს ერთგვარი თვითწმენდის პროცესი, რომელსაც ახლა ჩვენ თვალს ვადევნებთ, – განაცხადა იურიდიულ საკითხთა საპარლამენტო კომიტეტის თავმჯდომარის პირველმა მოადგილემ თორნიკე ჭეიშვილმა გადაცემაში „დღის ქრონიკა“, რადიკალურ ოპოზიციაში მიმდინარე მოვლენების განხილვისას.

მისი თქმით, ფაქტი ერთია, რომ რადიკალური ოპოზიციის ყველა დაჯგუფება ერთად არის გადაშვებული იმგვარ პოლტიიკურ ჭაობში, რომლიდანაც გამოსვლა მათ ვეღარ მოუხერხდებათ.

„ჩვენ შეგვიძლია გულწრფელი სამძიმარი გამოვუცხადოთ ამ ადგილობრივი რადიკალების, უსამშობლოების გარე პატრონებს, მათ შორის მათ, ვინც ბრიუსელში გახლავთ მოკალათებული. აბსოლუტურად გაუცრუეს მათ ყველანაირი იმედი იმასთან მიმართებით, რომ რამე შეიძლებოდა აქაური რადიკალური და პოლიტიკურად აბსოლუტურად დეგრადირებული დაჯგუფებებისაგან გამოსულიყო და რაიმე შედეგისთვის მიეღწიათ. მეორე მხრივ, მისალოცი ამბავია ქართველი საზოგადოებისთვის, დემოკრატიისთვის, იმდენად, რამდენადაც ფაქტია, რომ მხოლოდ და მხოლოდ სარგებლის მომტანი შეიძლება იყოს ეს ერთგვარი თვითწმენდის პროცესი, რომელსაც ახლა ჩვენ თვალს ვადევნებთ.

ზედმეტი ჩარევის გარეშეც კი, დაფინანსების, ელექტორატის გარეშე დარჩენილებმა დაიწყეს ერთმანეთის დაჭმა ამ რადიკალურმა დაჯგუფებებმა. როგორც ჩანს, ისინი ცდილობენ, რომ სახე მაინც შეინარჩუნონ საკუთარი გარე პატრონების წინაშე და რომელიღაც დაწინაურდეს ამ ურთიერთბრალდებებისა და პაექრობის გათვალისწინებით. თუმცა აქ მოცემულობა, მე მგონი, ნათელია: ისინი ყველანი ერთად არიან გადაშვებულები იმგვარ პოლტიიკურ ჭაობში, რომლიდანაც გამოსვლა მათ ვეღარ მოუხერხდებათ“, – განაცხადა ჭეიშვილმა.

მანვე აღნიშნა, რომ ის კონსტიტუციური სარჩელი, რომელიც მმართველ გუნდს აქვს საქართველოს საკონსტიტუციო სასამართლოში წარდგენილი, იქნება ერთ-ერთი ფინალური აკორდი იმ პროცესში, რომელსაც ქართული პოლიტიკური სპექტრის რადიკალური ძალისგან გათავისუფლება ჰქვია.