შალვა პაპუაშვილი ლაზარე ჯორბენაძის საქმეზე: ყველამ, ვინც ჩვენება მისცა, თქვა, რომ არიან ჭორიკნები და ამ ჭორაობაზე უნდათ ხალხი აანერვიულონ, შეთხზან კონსპირაციები

ყველამ, ვინც ჩვენება მისცა, თქვა, რომ არიან ჭორიკნები და ამ ჭორაობაზე უნდათ ხალხი აანერვიულონ, შეთხზან კონსპირაციები, - განაცხადა პარლამენტის თავმჯდომარემ შალვა პაპუაშვილმა ლაზარე ჯორბენაძის საქმეზე „ასავალ-დასავალის“ ჟურნალისტებისა და პოლიტიკოსების დაკითხვასთან დაკავშირებით.

მისი თქმით, მათ ბოდვა აქციეს საკუთარი პროპაგანდის იარაღად.

„ასავალ-დასავალი“ ცალკე მოვლენაა. მათ შორის, ერთ-ერთი თემა, რომელიც ეხება ადამიანს, რომელმაც თავი მოიკლა, აჩვენებს ამ მედიის მორალურ სახეს, როდესაც ადამიანის ბოდვა აქციეს საკუთარი პროპაგანდის იარაღად. დღეს გამოდიან, რედაქტორს ვუსმენდი და ამბობენ, რომ არანაირი მტკიცებულება არ მინახავს, არც ფურცელი, არც დოკუმენტი, არაფერი მინახავს... და გამოდიან და იმ გარდაცვლილი ადამიანის სახელით ბრალს უყენებენ ადამიანებს თუ ხელისუფლებას ისე, რომ არაფერი აქვთ.

ამ გამოკითხვების პროცესმა ყველაზე კარგად დაგვანახა, სამწუხაროდ, თუ რა უნარი აქვს მედიას, რომ შეუძლია, აბსოლუტური ბოდვა ისე წარმოაჩინოს და საზოგადოება აალაპარაკოს, ვიღაცას დააჯეროს, რომ თავადაც ცინიკურად, ძალიან კარგად იცოდნენ, რომ ეს არის ბოდვა.

საქმე საქმეზე როცა მიდგა, როცა სერიოზულად დაისვა კითხვები, გამოძიება ტარდება და ეკითხებიან - აბა, რა გაქვთ ხელში? არაფერი აქვთ და მტკიცდება, რომ არიან ჭორიკნები. ყველამ, ვინც ჩვენება მისცა, თქვა, რომ ვართ ჭორიკნები და ვჭორაობდით ჩვენთვის და ამ ჭორაობაზე ხალხი უნდა აანერვიულონ, შეთხზან კონსპირაციები“, - განაცხადა პაპუაშვილმა.

მისივე შეფასებით, „ასავალ-დასავალის“ თემა არის ძალიან მნიშვნელოვანი მაგალითი იმისა, რომ მედია არის ძალიან სასტიკი იარაღი, რომლითაც შეიძლება ადამიანებს სიცრუე წარმოუდგინონ ჭეშმარიტებად.