გიორგი ზვიადაძე: მოსაყდრის დასახელება სხვა მღვდელმთავრების მიმართ უნდობლობას არ ნიშნავს

სასულიაერო აკადემიის რექტორი გირგი ზვიადაძე საპატრიარქო ტახტის მოსაყდრის დასახელების მნიშვნელობას განმარტავს და აცხადებს, რომ პატრიარქის ეს გადაწყვეტილება სხვა მღვდელმთავრების მიმართ უნდობლობას ხაზს არ უსვამს.

“საქართველოს კათოლიკოს-პატრიარქს აქვს კანონიკური უფლებამოსილება და მას შეუძლია ნებისმიერ დროს დაასახელოს საპატრიარქო ტახტის მოსაყდრე. საპატრიარქო ტახტის მოსაყდრეს პატრიარქი განსაკუთრებით იმ შემთხვევაში ასახელებს, როდესაც თვლის, რომ შესაძლებლია რომელიმე პიროვნების დასახელებამ გარკვეულ გაუგებრობებს ბოლო მოუღოს, აღმოფხვრას გაუგებრობები და როცა მას რომელიმე პიროვნების დახმარება პირადად სჭირდება.

საპატრიარქო ტახტის მოსაყდრედ რომელიმე პიროვნების გამორჩევა და დასახელება არ ნიშნავს იმას, რომ პატრიარქს არა აქვს უდიდესი პატივისცემა სხვა მღვდელმთავრების მიმართ, ან რაიმე უნდობლობა აქვს სხვა მღვდელმთავრების მიმართ. ეს ნამდვილად ასე არ არის. საქართველოში ეს არის უნიკალური მოვლენა. 40 წელია პატრიარქი მართავს საქართველოს მართლმადიდებელ ეკლესიას. მას დღესაც ხელთ აქვეს სადავეები. ყველა მღვდელმთავარი საქართველოს მართლმადიდებელ ეკლესიაში არის გამორჩეული და ხელდასხმული პატრიარქის მიერ“, - აცხადებს ზვიადაძე.

საპატრიარქო განცხადებას ილია მეორის გადაწყვეტილებასთან დაკავშირებით, რომელიც პატრიარქის მოსაყდრედ მიტროპოლიტ შიო მუჯირის დანიშვნას ეხება, უახლოეს მოამავალში გამოაქვეყნებს. ამ განცხადებაში ასევე განიმარტება მოსაყდრის უფლება-მოვალეობები.

გუშინ პატრიარქმა საკუთარ მოსაყდრედ ჩხოროწყუსა და სენაკის მიტროპოლიტი შიო მუჯირი დაასახელა.