საპარლამენტო უმრავლესობის წევრის, ირაკლი კობახიძის განცხადებით, კონგრესმენების წერილში კონკრეტული უზუსტობებია, რასაც რეაგირება მოჰყვება. მმართველი გუნდის წარმომადგენელმა გადაცემაში „დღის ქრონიკა“ განაცხადა, რომ რეაგირება სხვადასხვა ფორმით იქნება და მუშაობა ამ მიმართულებით უკვე დაწყებულია. 

„პირველ რიგში ვგულისხმობ კომუნიკაციას წერილის ავტორებთან. თებერვალში უკვე არის დაგეგმილი ჩვენი წარმომადგენლის ვიზიტი. კონგრესმენების წერილში არის ტექნიკური, ფაქტობრივი უზუსტობა და ხარვეზი, რასაც თავისი მიზეზი უნდა ჰქონდეს. ეს მიზეზი ჯერ არ ვიცით. ამიტომ დაგვჭირდება კომუნიკაცია წერილის ავტორებთან. დღემდე, ადამ კინზინგერთან შეხვედრის საშუალება გვქონდა, თუმცა ეს როგორც ჩანს საკმარისი არ აღმოჩნდა. მომავალში, ჩვენ უნდა დავეხმაროთ კინზინგერს, რომ მის წერილში ფაქტობრივი უზუსტობები არ იყოს“, - განაცხადა ირაკლი კობახიძემ.  

მისივე თქმით, სავარაუდო მიზეზი შეიძლება იყოს ინტენსიური კომუნიკაცია სხვების მხრიდან, ეს შეიძლება იყოს ლობისტური ხელშეკრულებები, რაც იმას ნიშნავს, რომ გარდა ოპონენტებისა, მაგალითად, „ნაცმოძრაობის“ წარმომადგენლებისა, კონგრესმენებთან შესაძლოა, მუშაობენ კონკრეტული ამერიკელი პოლიტიკოსებიც.

„ერთ-ერთი ასეთი კონტრაქტი გაუმჟღავნდა „ნაციონალურ მოძრაობას“, როდესაც დააკონტრაქტეს ერთ-ერთი ამერიკული ორგანიზაციის ბორდის თავმჯდომარის მოადგილე. ამ ხელშეკრულებით კონკრეტული პოლიტიკოსი იღებს პასუხისმგებლობას, რომ შენს მიმართ საჯარო მხარდაჭერა უზრუნველყოს.

ოპოზიცია ცდილობს ამ ყველაფრის დრამატულად ჩვენებას. სინამდვილეში, კონგრესმენების განცხადებები გვახსოვს 2012 წლამდეც - რომ იყო დემოკრატიული გარემო, ციხეებში ყველაფერი კარგად იყო, დემონსტრანტების წინააღმდეგ არავინ იყენებდა ძალას და ა.შ. მაშინაც იყო კონგრესმენების წერილები, რომელიც ხელს აძლევდა „ნაცმოძრაობას“, დღესაც არის, მაგრამ ბოლოს ყოველთვის იმარჯვებს სიმართლე და 2012 წელსაც სიმართლემ გაიმარჯვა“, - განაცხადა ირაკლი კობახიძემ.

ოთხმა კონგრესმენმა პრემიერმინისტრ გიორგი გახარიას წერილით 22 იანვარს მიმართა. 

გარდა ამისა, რესპუბლიკელი კონგრესმენი მარკუეინ მალინი გიორგი გახარიასადმი 19 იანვარს გაგზავნილ წერილში„საქართველოს დემოკრატიული ღირებულებებისგან გადახვევითა და ეკონომიკის გაუარესებით“ შეშფოთებულია.

მანამდე კი ამერიკელმა კონგრესმენებმა, ადამ კინზინგერის თაოსნობით, საქართველოს პრემიერმინისტრს წერილით 2019 წლის 16 დეკემბერსაც მიმართეს და პარლამენტის მიერ პროპორციულ საარჩევნო სისტემაზე უარის თქმის გამო შეშფოთება გამოთქვეს.