„ოპოზიცია ჩვენს პარტნიორებს აწვდის ტყუილს, დეზინფორმაციას, ჩვენ ამას სიმართლეს ვუპირისპირებთ. საბოლოო ჯამში, სიმართლე აუცილებლად გაიმარჯვებს“, - ასე აფასებს „იმედის კვირასთან“ „ქართული ოცნების“ აღმასრულებელი მდივანი ირაკლი კობახიძე ოპოზიციისა და მათთან დაკავშირებული პირების მიერ ევროპარლამენტარებისთვის გაგზავნილ წერილს.

ირაკლი კობახიძე ამობს, რომ წერილზე ხელმომწერი პირები რალურად „ნაციონალურ მოძრაობას“ წარმოადგენენ, წერილში კი თავს, განსხვავებული დღის წესრიგის მქონე მრავალფეროვანი პოლიტიკური სპექტრის წარმომადგენლებად წარადგენენ. მათი მიზანი კი ნებისმიერი საშუალებით, მათ შორის პარტნიორებისთვის მცდარი ინფორმაციის მიწოდებით იმ განცდის შექმნაა, რომ ქვეყანა არასწორი გზით ვითარდება. 

„გახსოვთ, როგორ დარბოდნენ ისინი კაბინეტებში იმისთვის, რომ საქართველოს არ მიეღო ვიზალიბერალიზაცია, თუმცა ეს მცდელობაც წარუმატებელი იყო. და ეს მორიგი წერილიც აუცილებლად წარუმატებელი იქნება“, - აცხადებს ირაკლი კობახიძე. 

„ივანიშვილის მთავრობა განაგრძობს ოპონენტებზე ზეწოლას პოლიტიკურად მოტივირებული სამართლებრივი დევნით, ნაცვლად იმისა რომ კონსენსუსისთვის ხელშემწყობი პოზიციებით დაჯდეს მოლაპარაკების მაგიდასთან....

იმის მაგივრად, რომ საქართველოში დემოკრატიული პროცესის წინსვლა დაუშვას, ივანიშვილმა გადაწყვიტა მიმართოს სამართლებრივ დევნას -პოლიტიკური ოპონენტების, დამოუკიდებელი მედიის, იმ ბიზნესმენების წინააღმდეგ, ვინც მხარს უჭერენ დამოუკიდებელ მედიას, პოლიტიკურ და სამოქალაქო აქტივისტებს. აშკარაა, რომ მთავრობის მიზანი დამოუკიდებელი მედიის ჩახშობა, პოლიტიკური ოპონენტების დასუსტება და პოლიტიკური აქტივიზმისგან მოქალაქეების ჩამოშორებაა“, - ეს ამონარიდებია იმ წერილიდან, რომელიც ევროპარლამენტარებს ოპოზიციის ნაწილმა გაუგზავნა. წერილს ხელს 14 ადამიანი აწერს. მათ შორის გიგი უგულავა, გიგა ბოკერია, ნიკა მელია და ნიკა გვარამია.