„ჩვენ აშშ-ში ვიზიტისას ცალსახად ვთქვით, რომ ანაკლიის პროექტს ჩვენთვის გეოსტრატეგიული მნიშვნელობა აქვს და მომავალში აუცილებლად განხორციელდება“, -განაცხადა „იმედის“ „შაბათის ქრონიკასთან“ საგარეო საქმეთა მინისტრმა დავით ზალკალიანმა. 

საგარეო საქმეთა მინისტრმა გადაცემში აშშ-ში ოფიციალური ვიზიტი შეაჯამა.

ზალკალიანის განცხადებით, მას ანაკლიის პროექტთან დაკავშირებით კომუნიკაცია აშშ-ში „მარშალის ფონდში“ ექსპერტულ საზოგადოებასთან ჰქონდა. „მივაწოდე ზუსტი ინფორმაცია იმასთან დაკავშირებით, თუ რა დიდი მნიშვნელობისა ეს ჩვენი პროექტი. ვისაუბრე იმაზეც, რომ ვალდებულებები ხელისუფლების მხრიდან სრულფასოვნად იყო შესრულებული, განვიხილე ის ვალდებულება, რომელიც კონსორციუმის მხრიდან ვერ შესრულდა. ასევე ვთქვი ისიც, რომ ანაკლიის პროექტის განხორციელებას არანაირი საფრთხე არ ემუქრება“, - განაცხადა ზალკალიანმა.  

საგარეო საქმეთა მინისტრის თქმით, ხელისუფლება ყველაფერს აკეთებს, რომ ამ პროექტისთვის ინვესტიციები მოიზიდოს. „ჩვენ კიდევ ერთხელ მივმართეთ ჩვენს პარტნიორებს, რომ მოხდეს კიდევ უფრო მეტი წახალისება ამერიკული კომპანიების, რომელსაც ექნებათ სურვილი ამ პროეტში ინვესტორების. კიდევ ერთხელ დავუდასტურეთ, რომ ამ პროექტზე საუბარია ქვეყნის უმთავრეს დოკუმენტში, კონსტიტუციაში. ასევე ქვეყნის საგარეო პოლიტიკის სამწლიან სტრატეგიაში, რომელიც მაღალი ლეგიტიმაციით გამოირჩევა. ამ პროექტის შესახებ ჩვენ ვსაუბრობთ ყველა ჩვენს პარტნიორთან და არა მხოლოდ ამერიკის შეერთებულ შტატებთან, არამედ ევროკავშირთანაც. იქ მაღალი დონის შეხვედრაზე 18 პროექტთან ერთად ანაკლიის პროექტი წარვადგინეთ, იმისთვის, რომ ევროპული პარტნიორების მხრიდან მეტი ჩართულობა იყოს. ასევე დონორი ორგანიზაციების მხრიდან პროექტის განსახორციელებლად მოზიდული იყოს მეტი ფინანსური რესურსი“, - განაცხადა ზალკალიანმა. 

დავით ზალკალიანის ვიზიტი აშშ-ში 4-7 თებერვალს გაიმართა. მინისტრი კონგრესმენებს, სენატორებს და ექსპერტებს შეხვდა და სხვადასხვა ღონისძიებებში მიიღო მონაწილეობა. ვაშინტონში შეხვედრებს საპარლამენტო დელეგაცია აგრძელებს არჩილ თალაკვაძის ხელმძღვანელობით.

2020 წლის 9 იანვარს ცნობილი გახდა, რომ მთავრობა „ანაკლიის განვითარების კონსორციუმთან“ ხელშეკრულებას წყვეტს და პორტის ასაშენებლად ახალ ინვესტორს მოიძიებს.

ანაკლიის ღრმაწყლოვანი პორტის მშენებლობა 2017 წლის დეკემბერში დაიწყო. პორტის პირველი ფაზის მშენებლობის დასრულება და პირველი გემების მიღება 2020 წლის ბოლოსკენ იგეგმებოდა.