როდესაც საზოგადოებას შეკითხვები გაუჩნდათ პროკურატურასთან და პირადად ირაკლი შოთაძესთან, მან მიიღო ღირსეული გადაწყვეტილება და თანამდებობას ჩამოშორდა. მან, როგორც პროკურორმა, მიიღო ძალიან ღირსეული გადაწყვეტილება და მთელ საზოგადოებას აჩვენა, რომ მისთვის არ არის მთავარი სკამი და თანამდებობა, - ამის შესახებ ჟურნალისტებს პარლამენტის თავმჯდომარემ, არჩილ თალაკვაძემ განუცხადა, რომელიც აშშ-ში ოფიციალური ვიზიტით იმყოფება.

„ირაკლი შოთაძის მთავარი პროკურორობის პერიდოში პროკურატურამ ეფექტურად ჩაატარა გამოძიება არაერთ მნიშვნელოვან და გახმაურებულ საქმეზე, მათ შორის არის ორგანიზებული, ტრანსნაციონალური დანაშაული, ნარკოტრაფიკინგი და განსაკუთრებით მძიმე დანაშაულის შემთხვევები, რასაც საზოგადოების მაღალი ინტერესი მოჰყვა. როგორც კი ხორავას ქუჩის საქმესთან დაკავშირებით საზოგადოებას შეკითხვები გაუჩნდათ პროკურატურასთან და პირადად ირაკლი შოთაძესთან, მან მიიღო ღირსეული გადაწყვეტილება და თანამდებობას ჩამოშორდა. მან, როგორც პროკურორმა, მიიღო ძალიან ღირსეული გადაწყვეტილება და მთელ საზოგადოებას აჩვენა, რომ მისთვის არ არის მთავარი სკამი და თანამდებობა. მთავარია მორალური პრინციპები და მან მიიღო გადაწყვეტილება გადადგომის შესახებ.

მისი წასვლის შემდეგ გამოძიება გაგრძელდა. შოთაძე აღარ იყო ჩართული ამ პროცესში და გამოძიებამ საბოლოოდ შედეგები გამოკვეთა, პასუხისგებაში მიეცნენ სხვა ადამიანებიც. დღეს მეტწილად, როგორც დაზარალებულთა განცხადებებიდან იკვეთება, ამ საქმეზე კითხვები არის მოხსნილი. შესაბამისად, როდესაც საპროკურორო საბჭომ მიიღო გადაწყვეტილება მის კანდიდატურასთან დაკავშირებით, პარლამენტი კანონმდებლობის თანახმად განიხილავს ამ კანდიდატურას“, - განაცხადა თალაკვაძემ.

7 თებერვალს საპროკურორო საბჭომ გენერალური პროკურორის თანამდებობაზე ირაკლი შოთაძე შეარჩია და მის კანდიდატურას განსახილველად პარლამენტს გადაუგზავნის.

გენერალური პროკურორობის კონკურსში, საერთო ჯამში, 17 კანდიდატი მონაწილეობდა, თუმცა ორმა პირადი განცხადებით საკუთარი კანდიდატურა მოხსნა. გენერალურ პროკურორს პარლამენტი 6 წლით აირჩევს.

საქართველოს გენერალური პროკურორის თანამდებობა ვაკანტური მას შემდეგ გახდა, რაც პარლამენტმა შალვა თადუმაძე საქართველოს უზენაესი სასამართლოს მოსამართლედ აირჩია.

გენერალური პროკურორობის კანდიდატების სიის ნახვა შეგიძლიათ ამ ბმულზე.