საქართველოს დელეგაცია ევროპარლამენტში შეხვედრებს განაგრძობს. საქართველოს პარლამენტის თავმჯდომარის მოადგილე კახა კუჭავა და საგარეო ურთიერთობათა კომიტეტის ხელმძღვანელი ცოტა ხნის წინ ევრონესტის ვიცეპრეზიდენტს კრისტიან ტერეშს შეხვდნენ. განხილვის მთავარი თემები ამ შეხვედრაზე ევროკავშირსა და საქართველოს შორის თანამშრომლობა, ოკუპირებულ ტერიტორიებზე არსებული ვითარება და 2020 წლის საპარლამენტო არჩევნები იყო. 

ამასთან, ტერეშმა დასანანი და სამწუხარო უწოდა იმ განცხადებებს, რომლებიც ევროპარლამენტის საგარეო ურთიერთობის კომიტეტის წევრებმა გუშინდელ შეხვედრაზე გააკეთეს, ვინაიდან, მისი აზრით, ევროპელმა პოლიტიკოსებმა საქართველო ქულების დასაწერად არ უნდა გამოიყენონ. 

„ძალიან დიდი დატვირთვა აქვს ქართველი ხალხის ერთიანობას, ვინაიდან რუსეთის ერთ-ერთი მთავარი ტაქტიკაა იპოვნონ გზები, არგუმენტები იმისთვის, რომ ხალხი და საზოგადოება გაყონ. მინდა მივმართო საქართველოს მოქალაქეებს, მიუხედავად იმისა, თუ რომელ პარტიებს მიეკუთვნებიან. თქვენ გაქვთ ერთი ქვეყანა, სხვა ქვეყანა არ გაქვთ, ეს ყოველთვის უნდა გახსოვდეთ. მე არ ვარ ევროპარლამენტის საგარეო ურთიერთობა კომიტეტის წევრი, მე არ ვესწრებოდი სხდომას, მაგრამ, რა თქმა უნდა, მივიღე ინფორმაცია გუშინდელი მსჯელობის შესახებ. გული დამწყდა იმის გამო, თუ როგორ იყო განხილული საქართველოს საკითხი. მნიშვნელოვანია ქართველმა ხალხმა იცოდეს, რომ ევროპარლამენტის წევრები წარმოადგენენ სხვადასხვა ქვეყნებს. ისინი არიან პოლიტიკოსები. დასანანია ჩემთვის ვთქვა, რომ ბევრი მათგანი ამ შესაძლებლობას - სხვადასხვა ქვეყნის წარმომადგენლებთან საუბარს - იყენებს პოლიტიკური ქულების დასაწერად. ეს ხდება მგრძნობიარე თემების და დეტალების გათვალისწინების გარეშე. მე არ ვფიქრობ, რომ მიზანშეწონილი იყოს რომელიმე პოლიტიკური ჯგუფისთვის, გამოიყენოს საქართველო, როგორც ბრძოლის ველი და დააგროვოს პოლიტიკური ქულები ბრიუსელში. საქართველომ დაამტკიცა, რომ სანდო, ძლიერი პარტნიორია და ამას ვერავინ უარყოფს. ძლიერი პარტნიორია არამარტო ევროკავშირისთვის, არამედ ნატოსთვის. თქვენ გყავთ სხვადასხვა პოლიტიკური პარტიები, მათ აქვთ სხვადასხვა მოსაზრებები და ეს ამტკიცებს, რომ თქვენთან დემოკრატიაა. ეს საკითხები, რაც შიდა დაპირისპირებებს ეხება, უნდა გადაწყდეს შიგნით. არ არის მიზანშეწონილი არც ერთი პოლიტიკური ლიდერისთვის ჩამოვიდეს, ლექციები წაგიკითხოთ, გააკრიტიკოს ქვეყანა და არ იცოდეს რეალურად რა ხდება. თქვენ გაქვთ შესანიშნავი ქვეყანა, ხართ არაჩვეულებრივი ხალხი და იამაყეთ საქართველოთი“, - განაცხადა კრისტიან ტერეშმა.

საქართველოს პარლამენტის თავმჯდომარის მოადგილე კახა კუჭავამ კი აღნიშნა, რომ დარჩენილი კვირის განმავლობაში საქართველოს დელეგაციის წევრები ევროპარლამენტარებთან შეხვედრებისთვის გამოიყენებენ და მაქსიმალურად მიაწოდებენ დეპუტატებს ინფორმაციას ოპოზიციასთან დიალოგის და ქვეყანაში მიმდინარე სხვა პროცესების შესახებ. მისივე თქმით, გუშინდელმა ფორმატმა მას ამის საშუალება არ მისცა, რადგან კითხვებზე პასუხების გასაცემად მხოლოდ 2 წუთი ჰქონდა. 

„გვექნება შეხვედრები ყველა იმ ადამიანთან, ვისთანაც წინასწარ იყო დაგეგმილი, ვისთანაც ახლა იგეგმება, რადგან საკითხები, რომლებზეც ვერ მოვასწარით საუბარი, მათ აქვთ სურვილი მათზე უფრო დეტალურად ვისაუბროთ. მათთან ერთად გვექნება ამ საკითხებზე მსჯელობა. აქ საუბარი არ არის მარტო არაობიექტურ ინფორმაციაზე. აქ ასევე საუბარი არის იმ ფაქტებზე, რომლებიც შეიძლება სხვანაირად იყოს გამოყენებული, შესაბამისად, ცვლის რეალობას. განსაკუთრებით ვცდილობ შევხვდე მათ, ვინც ძალიან კრიტიკული იყო ჩვენს მიმართ, რადგან არ ჰქონდათ პასუხის მოსმენის საშუალება იმ კითხვებზე, რომლებიც მათ დასვეს, 2 წუთი პასუხისთვის ძალიან ცოტა დროა. თუმცა ამ ფორმატში ვცდილობ ჩვენი პოზიციები წარვუდგინო მათ“, - განაცხადა კუჭავამ.