რა მოდელითაც არ უნდა ჩატარდეს არჩევნები, ის იქნება გამჭვირვალე, სამართლიანი და თავისუფალი და ჩვენს მოქალაქეებს ექნებათ საშუალება, თავისი არჩევანი დააფიქსირონ. ჩვენ პატივს ვცემთ ამომრჩევლებს და მზად ვართ, რომ პასუხისმგებლობა ავიღოთ მომავალზე, - ამის შესახებ საქართველოს პარლამენტის თავმჯდომარემ არჩილ თალაკვაძემ „იმედის“ ეთერში განაცხადა. 

მისი თქმით, აშშ-ში კითხვები გამოიწვია პოლიტიკურ პარტიებს შორის საარჩევნო საკითხებთან დაკავშირებულმა დაპირისპირებამ.

„ჩვენ აქ ჩამოვედით კონკრეტული გეგმით, კონკრეტული წინადადებებით, რომელიც აქ ჩამოსვლამდე ოპოზიციისთვისაც ცნობილი იყო და ჩვენ ეს ინფორმაცია მათ მივაწოდეთ. შემდეგი დიალოგის ფარგლებში ვემზადებით, რომ გარკვეულ შეთანხმებებს მივაღწიოთ. ყოველ შემთხვევაში ჩვენი მხრიდან არის ძალიან კომპრომისული და სამართლიანი შეთავაზება გაკეთებული ოპოზიციის მისამართით, რაც ეხება 2020 წლის არჩევნების ჩატარებას კომპრომისული მოდელით, რაც განსხვავდება იმისგან, რაც დღეს წერია კანონმდებლობაში. მოგეხსენებათ 73/77-ზე არის განაწილება და არის გარკვეული წინ გადადგმული ნაბიჯი იქითკენ, რომ საქართველოს ჰქონდეს საშუალება უფრო მეტად დააკომპლექტოს პარლამენტი პროპორციული წესით.

ჩვენი შეთავაზება 100/50-ზე არის მოლაპარაკებების მაგიდაზე. ოპოზიციისგან უკვე მომდევნო რაუნდში ველოდებით პასუხებს. თუ ოპოზიცია არ დათანხმდება ამას, შეთანხმების ფანჯარა იხურება თებერვალში, რადგან პარლამენტს უკვე დრო აღარ რჩება ამ ცვლილებების განსახორციელებლად. ამას სჭირდება მინიმუმ 3 თვე. მოგეხსენებათ უკვე მივიღეთ ეუთო/ოდირის დასკვნა, სადაც წერია, რომ სასურველია საერთოდ ხელისუფლებამ და პარლამენტმა არ ახლოს ხელი საარჩევნო სისტემის დიდ ცვლილებებს, რასაც თუ გავითვალისწინებთ, ეს ნიშნავს, რომ ოპოზიციის მოთხოვნას კიდევ უფრო ნაკლები საფუძველი აქვს. ჩვენი პირობა ძალაშია და გვინდა, რომ შეთანხებას მივაღწიოთ.

თუ გადავხედავთ ბოლოდროინდელ პოლიტიკურ მოვლენებს, ჩვენ ვართ ხვალინდელ დღეზე ორიენტირებული, ოპოზიციის ეს დესტრუქციული ნაწილი კი გუშინდელ დღეზეა ორიენტირებული", - აღნიშნა არჩილ თალაკვაძემ.