აშშ საქართველოს განიხილავს, როგორც მის მთავარ პარტნიორს რეგიონში, - ამის შესახებ აშშ-ში საქართველოს ელჩმა, დავით ბაქრაძემ პარლამენტის თავმჯდომარისა და ქართული დელეგაციის შეხვედრების შეფასებისას განაცხადა.

მისი თქმით, აშშ-ის სახელმწიფო დეპარტამენტში და ასევე USAID-ში ძალიან მნიშვნელოვანი შეხვედრები გაიმართა, სადაც საქართველოს პარლამენტის თავმჯდომარესთან საუბრისას კიდევ ერთხელ ძალიან მკაფიოდ და ძლიერად დადასტურდა ის მხარდაჭერა, რომელიც საქართველოს აშშ-სგან აქვს.

„შეხვედრებზე განიხილეს ჩვენი ურთიერთობების, სტრატეგიული პარტნიორობის მთავარი მიმართულებები. ჩვენი უსაფრთხოებისა და თავდაცვის საკითხები, ეკონომიკურ-სავაჭრო ურთიერთობები. აქედან გამომდინარე ძალიან მნიშვნელოვანია ის პროექტები, რომლებიც ხორციელდება და რასაკვირველია არ არის საკითხი, რომელიც რჩება უყურადღებოდ მსგავსი მაღალი დონის შეხვედრების დროს.

ჩვენ გასულ წელს ძალიან მნიშვნელოვანი მხარდაჭერა მივიღეთ აშშ-სგან. კერძოდ, ინფრასტრუქტურული პროექტების მხარდაჭერის თვალსაზრისით. შარშან 50 მილიონი დოლარით დაფინანსდა ფოთის პორტი, ასევე კერძო ამერიკული კომპანიებისგან დაფინანსდა ბათუმის პორტის გაფართოების პროექტი", - განაცახდა დავით ბაქრაძემ.

ელჩის თქმით, საქართველოს აშშ-სთან არ გააჩნია საკითხი, რომელზეც პოზიციები შეუთანხმებელია. „ჩვენთვის  სტრატეგიული მნიშვნელობისაა მათ შორის ანაკლიის პროექტი. აქედან გამომდინარე, ჩვენ, როგორც საელჩო, ვმუშაობთ აქტიურად აშშ-ში, რომ ამ სტრატეგიულად მნიშვნელოვან პროექტს ჰქონდეს მტკიცე მხარდაჭერა", - აღნიშნა დავით ბაქრაძემ.

მისივე თქმით, არჩილ თალაკვაძემ ამერიკულ მხარეს გააცნო ის მნიშვნელოვანი რეფორმები, რომლებიც საქართველოს პარლამენტში ხორციელდება, მათ შორის დემოკრატიული განვითარების, კანონის უზენაესობის, ადამიანის უფლებების თუ სხვა მიმართულებით.

ელჩი ამერიკელი კანონმდებლების წერილებსაც შეეხო. დავით ბაქრაძის განმარტებით, მათ განცხადებების საფუძველი ჰქონდათ იქიდან გამომდინარე, რომ იყო ძალიან მკაფიო უზუსტობები და პარლამენტის თავმჯდომარემ ამერიკულ მხარეს მიაწოდა სრული და ობიექტური ინფორმაცია, რომლის სანდოობას ეჭვქვეშ არავინ აყენებს.