ODIHR-ის წარმომადგენლებმა ოპოზიცია, პატარა ბავშვებივით, სასაცილო მდგომარეობაში ჩააგდეს და უთხრეს, რომ ისიც არ იციან, სად უნდა გაგზავნონ კანონპროექტი კონსტიტუციურობის დასადგენად, - ამის შესახებ საპარლამენტო უმრავლესობის წევრმა ირაკლი კობახიძემ „დღის ქრონიკაში“ განაცხადა, სადაც ე.წ. გერმანულ მოდელთან დაკავშირებით ეუთოს დასკვნაზე დასმულ შეკითხვებს უპასუხა. 

ირაკლი კობახიძის განცხადებით, დასკვნაში პირდაპირ არის მითითებული, რომ ერთადერთი ინსტანცია, რომელსაც ამ მოდელის კონსტიტუციურობის დადგენა შეუძლია, არის ეროვნული საკონსტიტუციო სასამართლო. საპარლამენტო უმრავლესობის წევრის შეფასებით, ოპოზიცია უხერხულ მდგომარეობაში ჩავარდა, ამის გადაფარვა კი ტყუილით სცადა.

„დავით უსუფაშვილის ადგილზე ყოფნას ნამდვილად არ ვისურვებდი, სამწუხაროდ, მას ტყუილის თქმა მოუწია. მან ერთ-ერთ ეთერში თქვა, რომ თითქოს ODIHR-ის დასკვნით, ე.წ. გერმანული მოდელი საქართველოს კონსტიტუციას შეესაბამება. დღეს ცდილობდა ამ ტყუილიდან გამოძრომას, თუმცა ამ ტყუილს კიდევ სხვა ტყუილს ამატებდა. 

გვემუქრებოდნენ, რომ გაიგზავნებოდა ეს დოკუმენტი ეუთოში და რომ ODIHR-ი დაადგენდა კონსტიტუციასთან ე.წ. გერმანული მოდელის შესაბამისობას, რაც თავიდანვე აბსურდი იყო. ამისთვის გაიგზავნა ეს დოკუმენტი ODIHR-ში და არა სხვა მიზეზით.

ეს იყო ამ ყველაფრის წინაისტორია. მარტივი პასუხი მიიღეს, რომ ODIHR-ის საქმე არ არის კანონპროექტის კონსტიტუციურობის შეფასება. ანუ, ODIHR-ის წარმომადგენლებმა ოპოზიცია პატარა ბავშვებივით სასაცილო მდგომარეობაში ჩააგდეს - უთხრეს, რომ ისიც არ იციან, სად უნდა გაგზავნონ კანონპროექტი კონსტიტუციურობის დასადგენად.

პირდაპირ არის მითითებული, რომ ერთადერთი ინსტანცია, რომელსაც ამის დადგენა შეუძლია, ეროვნული საკონსტიტუციო სასამართლოა. უხერხულ მდგომარეობაში ჩააგდეს ოპოზიცია, რომელმაც ამ უხერხულობის გადაფარვა ტყუილით სცადა, თუმცა ეს ტყუილი უკან მოუბრუნდათ, რადგან სიმართლე არის უმარტივესი - რისთვისაც გაიგზავნა დოკუმენტი, იმაზე უთხრა ODIHR-მა, რომ არ უნდა გაეგზავნათ“, - განაცხადა ირაკლი კობახიძემ.

ოპოზციის მიერ შეთავაზებულ სააარჩევნო მოდელზე ეუთო/ოდირმა დასკვნა  გამოაქვეყნა, რომელშიც ნათქვამია, რომ საერთაშორისო სტანდარტები არ აწესებს საარჩევნო სისტემების არჩევას, სისტემა, როგორიც არ უნდა იყოს, ქვეყნის სუვერენული გადაწყვეტილებაა, ხოლო ამა თუ იმ სისტემის არჩევა ფართო დისკუსიებისა და კონსენსუსის საგანი უნდა იყოს. 

ეუთო/ოდირის დასკვნაზე ოფიციალური განცხადება გაკეთდა მმართველი პარტიის ცენტრალურ ოფისში. როგორც ირაკლი კობახიძემ განაცხადა, ოპოზიციამ ეუთოში გააგზავნა საარჩევნო კოდექსის გერმანული მოდელის დამახინჯებული ვარიანტი და პასუხიც მიიღო შესაბამისი.

2019 წლის ნოემბერში ოპოზიციამ არჩევნების გერმანული მოდელით ჩატარება მოითხოვა. შემდეგ კი კანონპროექტიც შეიმუშავა. ამ ინიციატივით პირველად „შენების მოძრაობა“ გამოვიდა.