ეკონომიკისა და მდგრადი განვითარების მინისტრის მოადგილემ გენადი არველაძემ მედიის წარმომადგენლებს ექსპორტის ხელშეწყობის ინსტრუმენტები გააცნო, რომელთაც სამინისტრო მის სისტემაში შემავალი უწყებები და სხვა სახელმწიფო ინსტიტუტები წარმატებით იყენებენ ადგილობრივი მწარმოებლების - პოტენციური და მოქმედი ექსპორტიორების მხარდასაჭერად. 

საინფორმაციო შეხვედრა სამინისტროს მხარდაჭერითა და ევროკავშირის პროექტის „ევროკავშირსა და საქართველოს შორის ასოცირების შეთანხმების განხორციელების მხარდაჭერა - II ფაზა“ ორგანიზებით გაიმართა.

არველაძემ განსაკუთრებული აქცენტი გააკეთა საქართველოსა და ევროკავშირს შორის ღრმა და ყოვლისმომცველი თავისუფალი სავაჭრო სივრცის შესახებ შეთანხმების (DCFTA) ცნობიერების ამაღლების ისეთ ინსტრუმენტებზე, როგორიცაა DCFTA - საკონსულტაციო ჯგუფი, რომლის შემადგენლობაში შედიან საქართველოს მსხვილი ბიზნეს ასოციაციების, პროფესიული კავშირების და დამსაქმებლების წარმომადგენლები და სავაჭრო პალატები და სხვა.

არველაძის განცხადებით, სამინისტროს სსიპ სააგენტო „აწარმოე საქართველოში“ წარმატებით ახორციელებს ექსპორტის მხარდაჭერის სხვადასხვა მექანიზმს, როგოებიცაა პოტენციური ექსპორტიორების საერთაშორისო გამოფენებსა და მისიებში მონაწილეობის ხელშეწყობა, სავაჭრო პლატფორმებზე რეგისტრაცია, როგორიცაა www.tradewithgeorgia.com, რომლის განახლებაც აშშ-ის საერთაშორისო განვითარების სააგენტოს პროექტის „USAID REAP“ მხარდაჭერით განხორციელდა.

„პორტალის მეშვეობით ექსპორტიორი და ექსპორტზე ორიენტირებული კომპანიები  ისარგებლებენ ერთი ფანჯრის პრინციპით, რაც გულისხმობს ერთ სივრცეში კომპანიის პროფილის შექმნას, საექსპორტო პოტენციალის განსაზღვრას, საერთაშორისო  ღონისძიებაზე რეგისტრაციას, ონლაინ ხელშეკრულების გაფორმებას და სხვა რელევანტური აქტივობის განხორციელებას,“ - განაცხადა არველაძემ.

რაც შეეხება გამოფენა - გაყიდვებში მონაწილეობას, სააგენტოს მხარდაჭერით 2019 წელს ევროკავშირში გამართულ 11 წამყვან ღონისძიებაში მონაწილეობა 102-მა ქართულმა კომპანიამ მიიღო.