საქალაქო სასამართლო დემოკრატიული მოძრაობის სარჩელს განიხილავს

"დემოკრატიული მოძრაობა - თავისუფალი საქართველოს" წევრების სარჩელის განხილვა თბილისის საქალაქო სასამართლოში გრძელდება. ისინი გლდანის ოლქში, კონკრეტულ უბნებზე, ხმების ხელახლა გადათვლას ითხოვენ.

"ჩვენ ხმების გადათვლას ვითხოვთ მთელ საქართველოში და მათ შორის, აქ. რამოდენიმე უბანზე 22 ოქტომბერს გადაითვალა ხმები, აღმოჩნდა რომ ისანში, ერთ-ერთ კონკრეტულ უბანზე მოპარული იყო 50 ხმა, კასპში მოპარული იყო 40 ხმა, საშუალოდ, უბანზე - 45 ხმა. ეს გამოდის არა 1 და 2 პროცენტი. ხმები მოპარულია ბიძინა ივანიშვილის განკარგულებით 8-დან 10%-მდე და ჩვენ ვითხოვთ მათ გადათვლას. კონკრეტულად გლდანის საარჩევნო ოლქში მითითებული გვაქვს კონკრეტული უბნები. ეს არის უბნები სადაც უამრავი ადამიანი აძლევს ჩვენებას რომ შემოხაზა ჩვენი ბლოკი", - აცხადებს კახა კუკავა.

მისი თქმით, გაყალბების მთავარი მიზანი კახა კალაძის პირველივე ტურში მოგება იყო. კუკავას მტკიცებით ბიულეტენები ხელოვნურადაც გააფუჭეს, რომ გაბათილებულიყო და არჩევნებში მონაწილეთა საერთო რაოდენობა შემცირებულიყო.

21 ოქტომბერს საქართველოში თვითმმართველობის არჩევნები ჩატარდა. ამ დღეს საქართველოს მოქალაქეებმა ქვეყნის მასშტაბით 64 საკრებულოს 2058 დეპუტატი და 64 მერი პირდაპირი წესით, 4 წლის ვადით აირჩიეს.