ევროკავშირმა უკრაინას დამატებით 4.36 მილიარდი ევროს დახმარება გამოუყო

ევროკომისიის ინფორმაციით, ევროკავშირმა უკრაინისთვის 4.36 მილიარდი ევროს ოდენობის მორიგი ფინანსური დახმარების პაკეტი გამოყო.

გადარიცხული თანხიდან 3.7 მილიარდი ევრო 2026 წლისთვის გათვალისწინებული მაკროეკონომიკური დახმარების სამი ტრანშიდან მეორეა, ხოლო დარჩენილი 658 მილიონი ევრო - თავდაცვის სესხის ფარგლებში გამოყოფილი მეშვიდე გადახდა.

„სანამ რუსეთი დაუსრულებელ თავდასხმებს აგრძელებს, უკრაინა ომის მეხუთე ზამთარში შედის. უკრაინისთვის სამართლიანი და ხანგრძლივი მშვიდობის მიღწევის პარალელურად, ევროკავშირის უცვლელი მხარდაჭერაც გრძელდება. დღევანდელი 4.36 მილიარდი ევროს გამოყოფით ჩვენ უკრაინას ეხმარებით საბაზისო სახელმწიფო სერვისების უზრუნველყოფასა და გადაუდებელი თავდაცვითი საჭიროებების დაკმაყოფილებაში“, - განაცხადა ევროკომისიის პრეზიდენტმა, ურსულა ფონ დერ ლაიენმა.

ევროკომისიის პრესრელიზის თანახმად, თავდაცვისთვის განკუთვნილი სახსრები მიმართული იქნება უპილოტო საფრენი აპარატების, რაკეტების, რადარების, რადიოელექტრონული ბრძოლის სისტემებისა და საჰაერო თავდაცვის საბრძოლო მასალის შესასყიდად. ამ თანხის უდიდესი ნაწილი უშუალოდ უკრაინული თავდაცვის კომპანიებისგან შესყიდვებს მოხმარდება.

ევროკომისიაში აღნიშნავენ, რომ ევროკავშირს 2026 წლისთვის უკრაინისთვის კიდევ 25.2 მილიარდი ევრო აქვს რეზერვში, რომლის უმეტესი ნაწილი თავდაცვის საჭიროებებზეა გათვლილი. ომის დაწყებიდან დღემდე ბრიუსელმა კიევს სულ 235.9 მილიარდი ევროს დახმარება გაუწია.