ტრამპის განცხადებით, ბრაზილიაში საპრეზიდენტო არჩევნები „შესაძლოა“ გაყალბდა

აშშ-ის პრეზიდენტმა დონალდ ტრამპმა ბრაზილიის საპრეზიდენტო არჩევნები გააკრიტიკა და განაცხადა, რომ კენჭისყრა „კიდევ ერთ გაყალბებულ არჩევნებს ჰგავდა“. ინფორმაციას POLITICO ავრცელებს.

გამოცემის ცნობით, ტრამპს ამის დამადასტურებელი მტკიცებულებები არ წარმოუდგენია. არჩევნებში მოქმედმა მემარცხენე პრეზიდენტმა ლუის ინასიუ ლულა და სილვამ გაიმარჯვა და პრეზიდენტის თანამდებობაზე მეოთხე ვადით დარჩენის შესაძლებლობა მოიპოვა.

„გულწრფელად რომ ვთქვა, ეს კიდევ ერთ გაყალბებულ არჩევნებს ჰგავდა. მხარე არ ამირჩევია, მაგრამ მსოფლიოსთვის ეს ძალიან ცუდი სანახავი იყო. არჩევნების შედეგები ეჭვს არ უნდა იწვევდეს და ეს ყველაფერი, ჩემი აზრით, ძალიან ცუდად გამოიყურებოდა“, - განუცხადა ტრამპმა ჟურნალისტებს მერილენდის შტატში, ენდრიუსის სამხედრო ბაზაზე.

კითხვაზე, აპირებდა თუ არა ბრაზილიის არჩევნებთან დაკავშირებით რაიმე ზომების მიღებას, ტრამპმა უპასუხა: „მე ბრაზილიას არ ვმართავ, მე აშშ-ს ვმართავ“. მან ასევე აღნიშნა, რომ ლულა მოსწონს, თუმცა არჩევნების ჩატარების ფორმა ცუდ შთაბეჭდილებას ტოვებდა.

ტრამპის განცხადებები ბრაზილიის მემარჯვენე კანდიდატის ფლავიო ბოლსონარუს პოზიციებს დაემთხვა. მან თავდაპირველად არჩევნების შედეგების გაუქმება მოითხოვა და კენჭისყრის საათების გახანგრძლივება ეჭვქვეშ დააყენა.

დავის მიზეზი გახდა უზენაესი სასამართლოს მოსამართლის გადაწყვეტილება, რომლის მიხედვითაც, ტრანსპორტთან დაკავშირებული შეფერხებების გამო, ზოგიერთ საარჩევნო უბანზე ხმის მიცემის პროცესი ორი საათით გახანგრძლივდა. გადაწყვეტილება ლულას მიერ დანიშნულმა მოსამართლემ მიიღო.

თუმცა, Reuters-ის ინფორმაციით, გახანგრძლივებული პერიოდით 35 000-ზე ნაკლებმა ადამიანმა ისარგებლა, მაშინ როდესაც ლულას უპირატესობა ოთხ მილიონ ხმას აღემატებოდა. ამასთან, ბოლსონარუს პარტიამაც მოითხოვა ზოგიერთ რეგიონში საარჩევნო უბნების მუშაობის გახანგრძლივება.

ტრამპის განცხადებებს ბრაზილიაში კრიტიკა მოჰყვა. ქვეყნის ვიცე-პრეზიდენტმა ჟერალდუ ალკმინმა აშშ-ის პრეზიდენტის შეფასებებს „სრულიად მცდარი“ და „უსაფუძვლო“ უწოდა. ბრაზილიის საარჩევნო ორგანოების წარმომადგენლებიც აცხადებენ, რომ კენჭისყრის დროის გახანგრძლივებას შედეგზე გავლენა არ მოუხდენია.

ტრამპს ლულას გამარჯვება ოფიციალურად არ უღიარებია, წერს POLITICO.